მისი თქმით, მას ჰქონდა ინფორმაცია, რომ დაკავების საფრთხე ემუქრებოდა:
“პრეზიდენტმა თქვა, რომ მე და გიგის [უგულავას] დაგვაკავებდნენ. არ ვიცი, ამ დარბაზში როგორ ფიქრობთ, მაგრამ პრეზიდენტი ნდობას იმსახურებს ჩვენში. ის, რომ საფრთხე მემუქრებოდა, ამაზე ბევრგან იყო საუბარი და მიმალვა რომ მდომოდა, მე 3-4-ჯერ ვიყავი საზღვარგარეთ,” – განაცხადა ვანო მერაბიშვილმა.
ზურაბ ჭიაბერაშვილის თქმით, სასამართლო პროცესს არა მხოლოდ ქვეყნის შიგნით, არამედ უცხოეთიდანაც აკვირდებიან და ოპოზიციური პარტიის გენერალური მდივნის დაპატიმრება დადებითად არ აისახება ქვეყნის ბედზე:
“თუმცა ჩვენ გაგებით ვეკიდებით და მზად ვართ გავიღოთ მსხვერპლი”, – განაცხადა ზურაბ ჭიაბერაშვილმა.
ამ დროისთვის მოსამართლე გასულია გადაწყვეტილების მისაღებად. მანამდე კი გაიმართა კითხვა-პასუხი ბრალდებისა და დაცვის მხარეებს შორის.
