“მარჯანიშვილიდან რუსთაველისკენ მოვდიოდით და მთელი გზის განმავლობაში გვაფრთხილებდა პოლიცია, რომ გადავსულიყავით გზიდან, თუმცა, როცა გამოვცდით რუსთაველის მეტროს, პატრული განსაკუთრებით აგრესიული გახდა, შემოვარდნენ და დაიწყეს ხალხის დაკავება, მათ შორის “ლაბორატორიის” იმ წევრებისაც, რომლებიც ტროტუარზე მოდიოდნენ”, – აცხადებს “ნეტგაზეთთან” საუბარში აქციის მონაწილე და თვითმხილველი ვახო ბერიკაშვილი.
მისი თქმით, მას პირადად არ დაუნახავს, რომ პოლიციელი სცემდა აქციის მონაწილეს, მაგრამ დაინახა, რომ რამდენიმე დაშავებული ადამიანი ეგდო ძირს.
აქციის კიდევ ერთი მონაწილის ბექა გაბადაძის თქმით, პატრულის თანამშრომლები პლასტმასის ბოთლებს ესროდნენ აქციის მონაწილეებს, ასევე, პოლიციელებს შორის იყვნენ უფორმოებიც, რომლებიც აქციის მონაწილეებს მანქანაში სვამდნენ.
ინციდენტს თვითმხილველია ჟურნალისტი მარი ნიკურაძე, რომელიც შეესწრო პოლიციელებსა და აქციის მონაწილეებს შორის შეხლა-შემოხლას სუპერმარკეტ “სმარტთან”:
“ფიზიკური დაპირისპირება იყო, ერთმანეთს ურტყამდენენ აქციის მოანწილეები და პატრულის თანამშრომლები, მოვყევი ამ ამბავში, წავიქეცი და რამდენიმე ადამიანმა გადამიარა ზემოდან. ასევე დავინახე, როგორ იჯდა ერთ-ერთი დაშავებული აქციის მონაწილე თიბისი ბანკთან კიბეზე, ის არაფერს არ აკეთებდა, თუმცა პატრულის ერთ-ერთი თანაშრომელი მივარდა და მანქანაში ჩატენა”,- ამბობს მარი ნიკურაძე.
დღეს პოლიციამ დააკავა აქციის ორგანიზატორების – “ლაბორატორია 1918”-ის წევრები, ასევე, დაკავებულებს შორისაა რამდენიმე ჟურნალისტი, მათ შორის, ზვიად ხუჯაძე (მე-9 არხი), თინა ყიფშიძე და ანი ჭანკოტაძე (“ლიბერალი”).