“არ შემიძლია არ გამოვეხმაურო საქართველოს პრემიერ-მინისტრის მიერ გაკეთებულ განცხადებებს, სადაც მან გამოთქვა ვარაუდი, რომ ჩვენ – საქართველოს მთავრობა, საქართველო ამზადებდა ჩრდილოკავკასიელ ტერორისტებს სხვადასხვა ოპერაციების განსახორციელებლად.
არა მხოლოდ ეს ზუსტად ჯდება იმ პროპაგანდაში, რომელსაც რუსები მთელი ეს წლები ეწეოდნენ ჩვენ წინააღმდეგ, ჩვენი დასუსტების და საქართველოს ხელში ჩაგდების მიზნით, ახლა ამერიკაშიც ბოსტონის ტერაქტის შემდეგ, რომელშიც, სამწუხაროდ, იყო ორი ჩეჩენი და ძალიან მნიშვნელოვანი თემა გახდა ეს და ამ პირობებში საქართველოს პრემიერ-მინისტრის განცხადება ამ თემაზე ასეთი სახით. საერთოდ თუ აცნობიერებს ის და მე უკვე აღარ ვიცი, აცნობიერებს თუ არა, თუ რა შარში ხვევს არა მე და შეიძლება, მან გააკეთა ეს ამ ამერიკის ვიზიტისთვის, არ ვიცი, რა მოტივაცია ჰქონდა, არამედ ხვევს მთელ ქვეყანას, საქართველოს. რა თქმა უნდა, მე დარწმუნებული ვარ, რომ ამას ამერიკაში სერიოზული ხალხია და ამას არავინ სერიოზულად არ მიიღებს, მაგრამ აქაც სხვადასხვა ძალები მუშაობენ და თუ შენ გინდა ყველაზე მოკლე გზა, რომ შენ დააკარგვინო საქართველოს დასავლეთის მხარდაჭერა ე.ი. სრულიად უიარაღოდ დატოვო ოკუპაციის წინაშე სრული დახმარების გარეშე დატოვო ჩვენი მეგობრების, საგარეო საფრთხის წინაშე, მაშინ უნდა ასეთ რაღაცებშიც სცადო მათი დარწმუნება, სცადო ჩვენი მეგობრების დარწმუნება.
სანამ მე ამ თანამდებობაზე ვარ და სანამ ჩვენ აქ გვისმენენ, ამას ალბათ ის ვერ მოახერხებს. მაგრამ არ შეიძლება ამ თემებით თამაში. ძალიან ვწუხვარ, რომ საქართველოს პრემიერ-მინისტრს ეს ან არ ესმის, ან არ სურს, რომ გაიგოს. მაგრამ მე მინდა ვუთხრა უბრალოდ მისი მთავრობის წევრებს, იქ არის ხალხი, რომლებსაც ეს არ შეიძლება, რომ არ ესმოდეთ, ბოლოს და ბოლოს, სხვადასხვა თანამდებობებზე არიან ადრე ნამუშევარნი საქართველოს სტრუქტურებში: თქვენ მაინც ამოიღეთ ხმა, თქვენ მაინც მიუთითეთ პრემიერ-მინისტრს, რომ ასე ნუ აკეთებს და თუ არ გიჯერებთ, მაშინ საჯაროდ თქვით ეს”, – განაცხადა მიხეილ სააკაშვილმა.
საქართველოს პრემიერ-მინისტრმა გუშინ განაცხადა, რომ არ გამორიცხავს საქართველოს მთავრობის შესაძლო თანამშრომლობას “ბოევიკებთან”:
“მე რამდენჯერმე გავაკეთე განცხადება, რომ სატრანზიტოდ იყო გამოყენებული საქართველოს ტერიტორია ჩრდილოეთ კავკასიიდან შემოსული ბოვიკების თუ სხვა შემოსული ბოევიკებისთვის და ამასაც ჩვენ მაქსმიმალურად ჩავხურეთ და აღარ განმეორდება,” – განაცხადა ივანიშვილმა.
