ნეტგაზეთი | კობახიძე: კონსტიტუციიდან 94-ე მუხლის ამოღებაზე პარლამენტში სერიოზულად ვიმსჯელებთ კობახიძე: კონსტიტუციიდან 94-ე მუხლის ამოღებაზე პარლამენტში სერიოზულად ვიმსჯელებთ – Netgazeti
RU | GE  

კობახიძე: კონსტიტუციიდან 94-ე მუხლის ამოღებაზე პარლამენტში სერიოზულად ვიმსჯელებთ

ირაკლი კობახიძის განცხადებით, პარლამენტში კონსტიტუციის ახალი პროექტის განხილვისას გადაწყდება, 94-ე მუხლს ბოლომდე ამოიღებენ, თუ  გარკვეული სახის რეგულაცია დარჩება. ამის შესახებ მან დღეს, 5 ივნისს გამართულ ბრიფინგზე განაცხადა.

“კონსტიტუციის 94-ე მუხლის ამოღებასთან დაკავშირებით კამპანია აწარმოეს. კონკრეტული ადამიანები არგუმენტების საფუძველზე ითხოვდნენ ცვლილებების განხორციელებას. ამ საკითხზე პარლამენტში სერიოზული მსჯელობა იქნება. როგორი სახით შეიძლება რეგულაცია-  ბოლომდე იქნება ამოღებული, გარკვეული ვადით განისაზღვრება, თუ როგორ, ეს საპარლამენტო განხილვის ფორმატში გადაწყდება. ამ საკითხთან დაკავშირებით სერიოზული მსჯელობა აუცილებლად შედგება,” – განაცხადა ირაკლი კობახიძემ.

მისივე თქმით, მიმდინარე კვირის განმავლობაში კონსტიტუციის პროექტს ხუტი კომიტეტი განიხილავს, რის შემდეგაც პროექტს პარლამენტის პლენარულ სხდომაზე განიხილავენ:

“ვენეციის კომისიის სხდომა დაინიშნა 16 ივნისს. ჩვენ გადავწყვიტეთ, რომ მათ საბოლოო დასკვნას დაველოდოთ. აქედან გამომდინარე, 19 ივნისს, ერთ კვირაში დაგვჭირდება რიგგარეშე სესიის მოწვევა,”   – ამბობს ირაკლი კობახიძე და აღნიშნავს, რომ ივნისში კანონპროექტს ორი მოსმენით მიიღებენ.

კონსტიტუციის 94-ე მუხლის მიხედვით, საერთო-სახელმწიფოებრივი გადასახადის ახალი სახის შემოღება, გარდა აქციზისა, ან საერთო-სახელმწიფოებრივი გადასახადის სახის მიხედვით არსებული განაკვეთის ზედა ზღვრის გაზრდა შესაძლებელია მხოლოდ რეფერენდუმის გზით, გარდა ორგანული კანონით გათვალისწინებული შემთხვევებისა. რეფერენდუმის დანიშვნის ინიცირების უფლება აქვს მხოლოდ საქართველოს მთავრობას.

ნეტგაზეთის მასალების სხვა გამოცემებში გადაბეჭდვის წესი
ავტორი
გივი ავალიანი არის ნეტგაზეთის საპარლამენტო კორესპონდენტი.