რამდენიმე ხელოვანმა კავკასიის ქვეყნებიდან თბილისში, ისტორიის მუზეუმში, [ქარვასლა] ფოტოები და ვიდეოინსტალაციები წარმოადგინა, რომელშიც ავტორები საბჭოთა ეპოქის კვალის წარმოჩენას შეეცადნენ. პროექტის „თანამედროვე ხელოვნების გალერეა” ფარგლებში, გამოფენა, სახელწოდებით „კავკასიის გავლით” 25 ნოემბერს გაიხსნა და 12 დეკემბრამდე გაგრძელდება.

პროექტი აერთიანებს ხუთი მხატვრის ნამუშევრებს კავკასიის ქვეყნებიდან: დაღესტანი – ტაუს მახაჩევა, ჩეჩნეთი – ასლან გაისუმოვი, სომხეთი – ვაჰრამ აღასიანი, აზერბაიჯანი – ალი ჰასანოვი და საქართველო – ვაჟიკო ჩაჩხიანი.

“გამოფენა აერთიანებს ხუთ მხატვარს კავკასიის ქვეყნებიდან, რომელთაც არ გააჩნიათ საერთო კონცეფცია, თემა, თუნდაც საგანი. პირიქით, წარმოჩენილია განსხვავება მათ კულტურულ მემკვიდრეობას და დღევანდელ რეალობას შორის. მხატვართა დღევანდელ მემკვიდრეობას თავისთავად განსაზღვრავს საბჭოთა ეპოქა, როდესაც ისინი საბჭოთა ხელისუფლებას იყვნენ დაქვემდებარებული. მაგრამ დროთა განმავლობაში მდგომარეობა შეიცვალა და მათი ქვეყნების პეიზაჟი თავის არსებობას პერიოდულად, ერთგვარი ირონიით ამტკიცებს. გამოუსწორებელი კვალი იგრძნობა შავ იუმორში, არასწორ ირონიაში, სადაც ასახულია კავკასიის თანამედროვეობის მდგომარეობა. გამოფენაზე წარმოდგენილი ობიექტები და ვიდეოინსტალაციები ამ სიბნელიდან გამოსულ, უცნობი მომავლის მოლოდინში არსებულ ცხოვრებას ასახავს”, – აცხადებს გამოფენის კურატორი ჩარლზ მერევეზერი.

პროექტი “თანამედროვე ხელოვნების გალერეა” ხორციელდება საქართველოს კულტურისა და ძეგლთა დაცვის სამინისტროს მხარდაჭერითა და კოორდინაციით.