აღნიშნულ ინფორმაციას საქართველოს თავდაცვის სამინისტრო ავრცელებს.

სამინისტროს ინფორმაციით, ბინებს ის სამხედრო მოსამსახურეები მიიღებენ, რომლებიც საქართველოს შეიარაღებულ ძალებში ოთხი და მეტი წელია მსახურობენ და საკუთარი ბინის უქონლობის გამო უხდებათ ქირით ან ნათესავებთან ცხოვრება. სახელმწიფოსგან ბინები ასევე გადაეცემათ შეიარაღებული ძალების სამეთაურო რგოლს – ასმეთაურების დონეზე.

მიმდინარე წლის ბოლოს „სამხედრო ქალაქში“ ახალ ბინებს საქართველოს შეიარაღებული ძალების კიდევ 1000 სამხედრო მოსამსახურე მიიღებს.

თბილისში, ისან–სამგორის რაიონში, „სამხედრო ქალაქის“ ტერიტორიაზე მიმდინარე სამშენებლო სამუშაოები დღეს საქართველოს თავდაცვის მინისტრმა დაათვალიერა. დიმიტრი შაშკინი კორპუსების, საცხოვრებელი ბინებისა და ეზოს კეთილმოწყობის პროცესს გაეცნო, რომელზეც ამჟამად 200 ადამიანია დასაქმებული და მშენებლებს გაესაუბრა.

,,სამხედრო ქალაქში’’ ამჟამად შენობებში კეთილმოწყობითი სამუშაოები მიმდინარეობს. 

„სამხედრო ქალაქის“ მშენებლობა 2007 წელს დაიწყო. ამჟამად ექსპლუატაციაში ერთი კორპუსია შესული, რომელშიც 2008 წლის აგვისტოს ომის დროს დაღუპული სამხედრო მოსამსახურეების ოჯახები ცხოვრობენ.

სამხედრო მოსამსახურეების საცხოვრებელი ფართით დაკმაყოფილება საქართველოს თავდაცვის სამინისტროს ახალი 3T კონცეფციის ერთ-ერთი კომპონენტის – ტოტალური ზრუნვის შემადგენელი ნაწილია.