22 ოქტომბერს ქუთაისში, ჭავჭავაძის გამზირზე მომხდარი ავტოსაგზაო შემთხვევაში მონაწილე მძღოლის ვინაობა დადგენილია, თუმცა იგი დაკავებული არ არის. შსს-ის ცნობით, “დანიშნულია ექსპერტიზა, რამაც უნდა დაადგინოს ავტოსაგზაო შემთხვევის გამომწვევი მიზეზი და მძღოლის ბრალეულობა”.
სოციალურ ქსელებში გავრცელდა ვიდეო, სადაც ჩანს, თუ როგორ ეჯახება ავტომანქანა ორ ქვეითს “ზებრაზე” გადასვლისას.
როგორც ავარიაში დაშავებულთაგან ერთ-ერთი ამბობს, ის და მისი მეგობარი, ვისაც მანქანა დაეჯახა, თანატოლები არიან – 15 წლისანი. ისინი შემთხვევის დროს ფეხბურთის ვარჯიშზე მიდიოდნენ.
როგორც ერთ-ერთი მათგანი ნეტგაზეთთან საუბრისას ამბობს, იგი უკვე სახლშია. მას ბეჭი აქვს ოდნავ გაბზარული და ფეხზე 4 ნაკერი ადევს, მეორე დაშავებულს კი ფეხი აქვს მოტეხილი და სახე დაზიანებული. მას, მისი მეგობრის ცნობით, ფეხზე ოპერაციას უკეთებენ. იგი ახლაც ქუთაისის ბავშვთა საავადმყოფოშია.
გამოძიება მიმდინარეობს სისხლის სამართლის კოდექსის 276-ე მუხლის პირველი ნაწილით, რაც გულისხმობს მძღოლის მიერ ავტომობილის მოძრაობის უსაფრთხოების ან ექსპლუატაციის წესის დარღვევას, რამაც ჯანმრთელობის ნაკლებად მძიმე დაზიანება გამოიწვია.
276-ე მუხლის პირველი ნაწილის დარღვევა ისჯება ჯარიმით, თავისუფლების შეზღუდვით ვადით სამ წლამდე, ამავე ვადით თავისუფლების აღკვეთით, თანამდებობის დაკავების ან საქმიანობის უფლების ჩამორთმევით ვადით სამ წლამდე.
შსს-ს არა აქვს ინფორმაცია, თუ რომელ საავადმყოფოში გადაიყვანეს დაშავებულები. ნეტგაზეთი ამ წუთებში ცდილობს, მათ შესახებ დამატებითი ინფორმაცია მოიძიოს.
ავტოსაგზაო შემთხვევა ქუთაისში, რუსთაველის გამზირზე. 22.10.2016. ფოტო: სქრინი “ფეისბუკზე” სხვადასხვა მომხმარებლის მიერ გავრცელებული ვიდეოდან
