ახალი ამბები

ივანიშვილი: მე ვერ შემაჩერებენ

17 ივნისი, 2012 •
ივანიშვილი: მე ვერ შემაჩერებენ

“ჩვენ ვერ შეგვაჩერებენ, მე ვერ შემაჩერებენ,” – განაცხადა ბიძინა ივანიშვილმა.

 

მან რამდენიმე წინაასაარჩევნო დაპირება გააჟღერა ოზურგეთში გამართულ მიტინგზე:

 

“ჩვენ შევამცირებთ გაუმართლებლად მაღალ კომუნალურ გადასახადებს, პენსია იქნება არანაკლებ საარსებო მინიმუმი, თავად საარსებო მინიმუმი გადაიხედება და მიუახლოვდება რეალობას. ჩვენ ისეთ ქვეყენას ავაშენებთ, სადაც არავის დაჭირდება ლუკმა-პურის საშოვნელად სამშობლოდან გადახვეწა. მე გპირდებით, რომ ჩვენ ხელს შევუწყობთ საქართველოში კულტურული ცხოვრების აღორძინებას. გპირდებით, რომ თქვენთან ერთად ვიბრძოლებ და არჩევნებით შევცვლით ამ ხელისუფლებას,” – განაცხადა ივანიშვილმა.

 

ბიძინა ივანიშვილმა გურიის რეგიონში კოალიცია “ქართული ოცნების” მაჟორიტარი დეპუტატობის კანდიდატები დაასახელა: ოზურგეთში– დიპლომატი ზვიად კვაჭანტირაძე, ლანჩხუთში – ფეხბურთელი თემურ ჩხაიძე, ხოლო ჩოხატაურში – მომღერალი თემურ ჭკუასელი. 

 

ივანიშვილის თქმით, კოალიცია “ქართული ოცნების” შემდეგი აქცია 1 ივლისს გაიმართება მცხეთა-მთიანეთში.

მასალების გადაბეჭდვის წესი