თბილისის საქალაქო სასამართლომ 27 სექტემბრის ნაციონალისტური მსვლელობისას დაკავებული 12 მონაწილისგან 7 არასრულწლოვანს აღმკვეთი ღონისმშობლების სახით მშობლების ზედამხედველობა შეუფარდა, დანარჩენ 5-ს კი – გირაო 10 ათასი ლარის ოდენობით.
იმის გამო, რომ დაკავებულთა ნაწილი არასრულწლოვანია, მოსამართლემ სხდომა დახურა. ერთ-ერთი დაკავებულის ადვოკატის, გელა ნიკოლეიშვილის ცნობით, პროკურორი იმედა გუგუშვილი ყველა დაკავებულისთვის აღკვეთის ღონისძიების სახით პატიმრობის შეფარდებას მოითხოვდა. ხოლო კიდევ ერთი ადვოკატის, ნიკოლოზ წულეისკირის ცნობით, დაკავებულთა ნაწილმა აღკვეთის ღონისძიების სახით გირაოს შეფარდების შყამდგომლობა დააყენა, ნაწილმა კი – ბრალდებულის მშობლების ზედამხედველობის ქვეშ გამწესება.
მას შემდეგ, რაც მსვლელობის მონაწილეები მარჯანიშვილის მეტროს მოპირდაპირე მხარეს შეჩერდნენ, რათა მსვლელობის სხვა მონაწილეებს დალოდებოდნენ, პოლიციის თანამშრომლებმა მათ დამშვიდებისაკენ მოუწოდეს და უთხრეს, ნებართვის გარეშე წინ არ წასულიყვნენ. ამის შემდეგ კი პოლიციასა და მსვლელობის მონაწილეებს შორის ფიზიკური დაპირისპირება დაიწყო. სწორედ ამის შემდეგ დააკავეს მსვლელობის 12 მონაწილე.
12 ბრალდებულის წინასასამართლო სხდომა 2016 წლის 3 ნოემბერს ჩაინიშნა. საქალაქო სასამართლოს ცნობით, წარდგენილი ბრალდების თანახმად, მსვლელობის 12-ვე მონაწილეს ბრალად ედება რასობრივი დისკრიმინაცია (ანუ ქმედება ჩადენილი პირთა ჯგუფის მიერ ჯანმრთელობისათვის საშიში ძალადობით და ასეთი ძალადობის გამოყენების მუქარით ეროვნული პატივისა და ღირსების დამცირების მიზნით, აგრეთვე ეროვნული და ეთნიკური კუთვნილების ნიშნით ადამიანების უფლების პირდაპირი და არაპირდაპირი შეზღუდვა, რამაც არსებითად ხელყო მისი უფლება, სსკ-ის 142-ე მუხლი) და ხულიგნობა (ესე იგი ქმედება, რომელიც უხეშად არღვევს საზოგადოებრივ წესრიგს და გამოხატავს საზოგადოებისადმი აშკარა უპატივცემულობას, ჩადენილი ძალადობითა და ძალადობის მუქარით, წინასწარი შეთანხმებით ჯგუფის მიერ, ჩადენილი იარაღად სხვა საგნის გამოყენებით, სსკ-ის 239-ე მუხლით).
