როგორ მიმდინარეობდა ძალადობრივი ნარკოპოლიტიკის საწინააღმდეგო აქცია სამტრედიაში [ფოტო/ვიდეო]

20 აგვისტოს სამტრედიის პოლიციის შენობასთან გამართული მოქმედი ნარკოპოლიტიკის საწინააღმდეგო აქცია პოლიციასთან დაპირისპირებით და წინასწარ დაგეგმილი კიდევ ერთი აქციით დასრულდა.

აქცია  “დემურ სტურუასთვის, ძალადობრივი ნარკოპოლიტიკა გრძელდება”  22 წლის ბიჭის თვითმკვლელობაზე გამოხმაურება იყო. სტურუამ თვითმკვლელობამდე  წერილი დატოვა, სადაც აღწერა, როგორ სცემდა და ემუქრებოდა ადგილობრივი პოლიციელი მას, თუ არ მიაწვდიდა ინფორმაციას იმის შესახებ, ვის მოჰყავდა მარიხუანა სამტრედიაში.

აქციაზე დასასწრებად ჩავიდნენ თბილისიდანაც, თუმცა აქ ასევე იმყოფებოდნენ დემურ სტურუას დედა, ძმა და სხვა ნათესავები. სტურუას დედამ, ნონა ჯოჯუამ თქვა, რომ იგი მოითხოვს დააკავონ ის პოლიციელი, რომელიც მის შვილს წერილში ჰყავს ნახსენები.

ჯოჯუა მიიჩნევს, რომ პოლიციელს ხელს აფარებენ, თუმცა იგი რომ ყოფლიყო უბრალო მოქალაქე, მას აქამდე დააკავებდნენ.

“სამტრედიაში კანონი და სამართალი არ არსებობს”, – ამბობს ნონა ჯოჯუა.

სამტრედიაში გამართულ აქციაზე ადგილი არ მოიძებნა პოლიტიკოსებისთვის, კონკრეტულად ზურაბ ჯაფარიძისთვის, რომელსაც მოსთხოვეს, რომ დაეტოვებინა ტერიტორია მაშინ, როდესაც ჟურნალისტებს ინტერვიუს აძლევდა.

დემურ სტურუას თვითმკვლელობის საქმეს საქართველოს პროკურატურა იძიებს.

აქცია სამტრედიაში პოლიციის შენობის წინ გაიმართა. აქციის მონაწილეებმა საპროტესტო ლოზუნგებთან ერთად მიიტანეს დემურ სტურუას წერილის გამოსახულებით სტიკერი, რომელიც პოლიციის მანქანას და ასფალტს დააკრეს.

20-მდე პოლიციელი პოლიციის შენობის კიბიდან აკვირდებოდნენ აქციის მსვლელობას, მათგან ორმა პოლიციის მანქანას დაკრული სტიკერები ააძრო.

აქციის დასასრულისკენ აქციის მონაწილეებმა მაშხალები დაანთეს და სკანდირებდნენ- “ძირს პოლიციური რეჟიმი”. ამ დროს ერთ-ერთმა მონაწილემ პოლიციის მანქანა შავი საღებავით შეღება, რასაც პოლიციელების გაღიზიანება მოჰყვა და ამ პირის დაკავება სცადეს.

აქციის მონაწილეეების წინააღმდეგობა, პოლიციისთვის მათი თანამოაზრის დაკავების უფლება არ მიეცათ, ხელჩართულ დაპირისპირებაში გადაიზარდა. მიტინგზე პოლიციას არავინ დაუკავებია. ისინი ჩამწკრივდნენ და აქციის მონაწილეებსა და პოლიციის მანქანებს შორის ჩადგნენ.

ამის შემდეგ აქციის მონაწილეებმა მსვლელობა მოაწყვეს და ახლომდებარე “მომავლის პარკისკენ” გაემართნენ”, რომელიც სამტრედიის მუნიციპალიტეტის გამგეობის წინ მდებარეობს, მსვლელობისას და პარკში ყოფნის პერიოდში ახლობდემრე კორპუსებიდან აქციის მონაწილეებს ადგილობრივი მცხოვრებლები უყურებდნენ, მცხოვრებთა ნაწილი აქციის მსვლელობის დროს პოლიციის შენობის მახლობლად, მანიფესტაციის მონაწილეებისგან მოშორებით იდგნენ და პროცესებს აკვირდებოდნენ.

დღევანდელ აქციაზე კიდევ ერთი აქციის შესახებ ამცნო შეკრებილებს “თეთრი ხმაურის მოძრაობის” წევრმა ნაჯა ორაშვილმა. 17 სექტემბერს უნდა გაიამართოს აქცია, რომელმაც ნაჯა ორაშვილის თქმით, უნდა გააერთიანოს ყველა სოციალური ჯგუფი. სად და როგორ გაიმართება აქცია, ამაზე მოგვიანებით გახდება ცნობილი.

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.

ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.

დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.

წესებსა და პირობებს დეტალურად შეგიძლია გაეცნო მხარდაჭერის პლატფორმაზე.