ბიძინა ივანიშვილის და საქართველოში აშშ-ს ელჩის ჯონ ბასის შეხვედრის შესახებ ივანიშვილის პრესსამსახური ავრცელებს.
ივანიშვილის პრესსამდივნოს ხელმძღვანელი ნონა ყანდიაშვილი აცხადებს, რომ შეხვედრა, რომელიც დახურული იყო, აშშ-ს საელჩოში დღეს გაიმართა და უკვე დასრულდა.
მას არა აქვს ინფორმაცია, ვისი ინიციატივით გაიმართა შეხვედრა და რატომ. მხოლოდ იმას ამბობს, რომ არსებულ პრობლემებზე ისაუბრეს, თუმცა დეტალები ვერ დააკონკრეტა:
“ჩვენც არ ვიცით, რადგან დახურული იყო”.
“ნეტგაზეთი” აშშ-ს საელჩოს პრესსამსახურსაც დაუკავშირდა, თუმცა იქ განაცხადეს, რომ შეხვედრის შესახებ ინფორმირებული არ არიან და დეტალების გარკვევას შეგვპირდნენ.
ქართველი მილიარდერი ბიძინა ივანიშვილი, რომელსაც ხელისუფლებაში მოსვლა სურს, ერთხელ უკვე შეხვდა აშშ-ს ელჩ ჯონ ბასს, როცა მან თავის სასახლეში დიპლომატიური კორპუსების წარმომადგენლები მიიღო.
