სოციალური კვლევისა და ანალიზის ინსტიტუტის მიერ ჩატარებულ კვლევის მიხედვით, გამოკითხულებში 2013 წლიდან საქართველოს პრემიერ– მინისტრის პოსტზე ბიძინა ივანიშვილი უფრო სასურველია, ვიდრე მიხეილ სააკაშვილი.
გამოკითხულთა 26,1 პროცენტი 2013 წლიდან პრემიერ-მინისტრად ბიძინა ივანიშვილს ისურვებდა, ხოლო 24,2 პროცენტი – მიხეილ სააკშვილს, 7,8 პროცენტი – ირაკლი ალასანიას, 6,8 პროცენტი – გიორგი თარგამაძეს, 6,4 პროცენტი – გიგი უგულავას, არცერთს – 0,5 პროცენტი.
პასუხის გაცემა აღნიშნულ კითხვაზე 13,8 პროცენტს გაუჭირდა.
დღეს, 8 დეკემბერს, საქართველოს განვითარების კვლევითმა ინსტიტუტმა (GDRI) სასტურო “თბილისი მარიოტში” “სოციალური კვლევისა და ანალიზის” ინსტიტუტის მიერ ჩატარებული სოციოლოგიური კვლევის შედეგების პრეზენტაცია გამართა. სულ გამოიკითხა 3 000 რესპონდენტი საქართველოს 11 რეგიონში.
აღნიშნული გამოკითხვა 2011 წლის 11-22 ნოემბერს ჩატარდა, რომელიც ეხებოდა მოსახლეობის პოლიტიკური განწყობებისა და ქვეყანაში მიმდინარე პროცესების მიმართ ამომრჩეველთა დამოკიდებულების შესწავლას.
მთელი ქვეყნისთვის შერჩევის ცდომილება არ აჭარბებს 1,8 პროცენტს 95– პროცენტიანი სანდოობით.
