რა უჯდება საქართველოს მოქალაქეებს აღდგომისთვის საჭირო პროდუქტებისა და ატრიბუტების შეძენა? ამის გასარკვევად თბილისში არსებულ რამდენიმე მაღაზიასა და ბაზრობას მივაკითხეთ.
სააღდგომო სუფრისთვის აუცილებელია წითელი კვერცხი და პასკა. თბილისის მაღაზიებში ერთი ცალი კვერცხის ღირებულება 28-დან 32 თეთრამდეა, საღებავის ფასი კი 0.50-დან 1 ლარამდეა. ამდენად, თუკი 30 კვერცხის შეღებვას გადაწყვეტთ, ამისთვის დაახელობით 9-10 ლარი დაგჭირდებათ.
სხვადასხვა ზომისა და საცხობის პასკას სხვდასხვა ფასი აქვს. მოზრდილი ზომის პასკის ფასი 7.80 ლარიდან იწყება, ხოლო შედარებით პატარა 4.00 ლარიც ღირს. ზოგიერთ საკონდიტროში პასკას კილოობით ყიდიან. მაგალითად, 1 კგ პასკა დაახლოებით 8.00 ლარი ღირს. ამდენად, თუკი 3-4 ცალ შედარებით მოზრდილ პასკას შეიძენთ, ამისთვის 25 ლარამდე თანხა დაგჭირდებათ.
სააღდგომო სუფრის ნაწილია, ასევე, ჯეჯილი, რომელშიც კვერცხებს აწყობენ. პლასტმასის თეფზებზე გახარებული ჯეჯილის კონების ყიდვა 1 ლარადაა შესაძლებელი.
“კვერცხი და პასკა კი არის უფლის, მაგრამ ადამიანებსაც ხომ გვინდა რამე? ჯერ მხოლოდ 20-მდე კვერცხი ვიყიდე შესაღებად, ქათამი, თევზი, პასკები, და 120 ლარამდე დავხარჯე,” – გვითხრა ვალერი ცეცხლაძემ.
თბილისში ჩვენ მიერ გამოკითხულთა უმეტესობა ამბობს, რომ სააღდგომო სუფრის მოსამზადებლად დაახლოებით 100-დან 150 ლარამდე ხარჯავს. ზოგიერთი პასკის გამოცხობას სახლში გეგმავს, რადგან, მათი თქმით, ასე უფრო იაფი უჯდებათ.
“რამდენიმე პასკა შევიძინე. დიდი ოჯახი მაქვს და ამიტომ ბევრის ყიდვა მიხდება. კვერცხს თავად ვღებავ. ტრადიცია გვაქვს ასეთი. თან გაცილებით იაფი მიჯდება. ყოველ წელს დაახლოებით 30-მდე წითელი კვერცხი გვაქვს ხოლმე,” – გვითხრა მანანა მჭედლიძემ.
აღდგომის დღესასწაულს მართლმადიდებელი ეკლესია წელს 1 მაისს აღნიშნავს.
