ყველა აბიტურიენტს, რომელმაც ეროვენული გამოცდების შედეგები გაასაჩივრა და აპელაცია დაუკმაყოფილდა, გასაჩივრებისას ბანკში შეტანილი თანხა, 30 ლარის ოდენობით თითოეულ საგანზე, უკან დაუბრუნდება.

ეროვნული გამოცდების ცენტრის ინტერნეტ გვერდზე აღნიშნული ინფორმაცია ამ დრომდე არ არის გამოქვეყნებული, თუმცა ეს ერთ-ერთი პუნქტია ეროვნული ცენტრის დებულებაში. ნეტგაზეთის ჟურნალისტს ეროვნული გამოცდების ცენტრში  იმ პროცედურაზე ესაუბრნენ, რომლებიც თანხის უკან დაბრუნებისათვის არის საჭირო.

აბიტურიენტმა გამოცდების ეროვნულ ცენტრში შესაბამისი ბლანკი უნდა შეავსოს და 26 სექტემბრიდან 26 ოქტომბრამდე „ლიბერთი  ბანკის“  ნებისმიერ ფილიალს მიაკითხოს. პირადობის მოწმობის წარდგენის შემდეგ კი  მათ თანხა უკან დაუბრუნდებათ.

2010 წელს სულ 2574-მა აბიტურინტმა  გაასაჩივრა ეროვნული გამოცდების შედეგები. თითოეული საგნის გასაჩივრებაში  აბიტურიენტებმა 30 ლარის ოდენობის თანხა გადაიხადეს, რამაც საერთო ჯამში 77 220 ლარი შეადგინა.

ეროვნული ცენტრის საზოგადოებასთან ურთიერთობის სამსახურის უფროსის მაია გაბუნიას თქმით, იმ აბიტურიენტების თანხა, რომელთაც საჩივარი არ დაუკმაყოფილდათ, სახელმწიფო ბიუჯეტში ჩაირიცხება.

აპელაციაზე დადებითი შედეგი 712 განაცხადზე იქნა მიღებული. შესაბამისად, სახელმწიფო ბიუჯეტში 55 900 ლარი გადაირიცხება.

ეროვნული გამოცდების შედეგებით უკმაყოფილო აბტურიენტს  9 დან 14 აგვისტომდე   შეეძლო გაესაჩივრებინა  თავისი შედეგი.