23 ნოემბერს „ნაციონალური მოძრაობა“ „ვარდების რევოლუციის“ 20 წლისთავის აღნიშვნას და დიდ შეკრებას გეგმავს. ამ დღეს პარტიას დაანონსებული აქვს ახალი გადაწყვეტილებების გამოცხადება.
„ძალიან მნიშვნელოვანი დღე იქნება ჩვენთვის. ძალიან ბევრ საინტერესოს გაიგებს ენმ-ის ამომრჩეველი. ჩვენ გვაქვს კონკრეტული გეგმა“, — განაცხადა „ნაციონალური მოძრაობის“ თავმჯდომარემ ლევან ხაბეიშვილმა „ტვ პირველის“ ეთერში.
ჟურნალისტმა მას ჰკითხა, 23 ნოემბერი იქნება ერთიანობის გამოვლინება და ისინი, ვინც წასვლას აპირებენ, წავლენ თუ დარჩებიან.
„თუ არადა, გავუშვებთ“, — თქვა ლევან ხაბეიშვილმა.
„ყველას კარგად უნდა ესმოდეს, რომ კონკრეტულ გადაწყვეტილებას მივიღებ. ჩემს მოთმინებასაც აქვს საზღვარი იმ პირობებში, როცა პარტიას აზიანებენ“, — დასძინა ლევან ხაბეიშვილმა.
ნიკა მელია, რომელიც პარტიაში დავით კეზერაშვილისა და ვანო მერაბიშვილის არაფორმალურ მმართველობაზე საუბრობს, ამბობს, რომ ენმ-ში მისი დარჩენა მხოლოდ იმ შემთხვევაში განიხილება, თუ პარტიაში კეზერაშვილ-მერაბიშვილის გავლენები აღარ იქნება. ნიკა მელიას განცხადებით, „ნაციონალური მოძრაობის“ დატოვების შესახებ გადაწყვეტილებას „ოპტიმალურ დროში“ მიიღებს.
მელიას თქმით, ენმ-ის დატოვებაზე გადაწყვეტილებას „ოპტიმალურ დროში“ მიიღებს