დღეს თბილისში შერატონ მეტეხი პალასში დაიწყო მეორე გამოფენა-ფორუმი, რომლის მიზანია შეზღუდული შესაძლებლობების მქონე (შშმ) პირთა პრობლემებსა და საჭიროებებზე საზოგადოების უკეთ ინფორმირება, ასევე სხვადასხვა არასამთავრობო და სამთავრობო ორგანიზაციების მიერ განხორციელებული საქმიანობებისა და სამომავლო გეგმების წარმოჩენა და თანამშრომლობის გაღრმავება.
გამოფენა-ფორუმში მონაწილეობას იღებენ შეზღუდული შესაძლებლობების მქონე პირთა თემაზე მომუშავე 42 ადგილობრივი არასამთავრობო და საერთაშორისო ორგანიზაციები. ფორუმის ფარგლებში გაიმართება დებატები, მონაწილე ორგანიზაციების საქმიანობების პრეზენტაცია, ფოტო-გამოფენა, შეზღუდული შესაძლებლობის მქონე პირების თემაზე შექმნილი კინოფილმებისა და სოციალური რგოლების ჩვენება. ღონისძიების დასკვნით ნაწილში სპეციალური პრიზებით დაჯილდოვდებიან სხვადასხვა ნომინაციაში გამარჯვებული პირები და ორგანიზაციები.
მეორე გამოფენა-ფორუმი იმართება ამერიკის შეერთებული შტატების საერთაშორისო განვითარების სააგენტოს პროექტის ”თანაბარი პირობების განვითარება შეზღუდული შესაძლებლობის მქონე ადამიანებისთვის” ფარგლებში. გამოფენა-ფორუმის ორგანიზატორები არიან კოალიცია “დამოუკიდებელი ცხოვრებისათვის”, “პირველი ნაბიჯი საქართველო” და Save the Children (გადავარჩინოთ ბავშვები). მხარდამჭერები: ქ. თბილისის მერია, შრომის, ჯანმრთელობისა და სოციალური დაცვის სამინისტრო, განათლებისა და მეცნიერების სამინისტრო, საქართველოს სახალხო დამცველის ოფისი, მსოფლიოს ინვალიდობის ინსტიტუტი, (WID) და გაეროს განვითარების პროგრამა (UNDP).