ცივი დღეების ქრონიკა, დღე მეორე

პირველი სიტყვა, რასაც ერთჯერადი მოკითხვების შემდეგ, თბილისის ქუჩებში მოისმენთ, ეს არის სიტყვები “როგორ ცივა”. გასაკვირიც არაფერია, ზამთრის მანძილზე თბილისში პირველად აცივდა ისე, რომ ჰაერის ტემპერატურა სერიოზულად დაეცა, -6 გრადუსამდე.

დღევანდელი დღისთვის სინოპტიკოსებს შედარებით დამაიმედებელი პროგნოზი აქვთ, თბილისში მხოლოდ 1 გრადუსი ყინვაა. თუმცა აღმოსავლეთ საქართველოს ქალაქებში კვლავ ძალიან ცივა, განსაკუთრებით ახალციხეში, სადაც 8 გრადუსი ყინვაა.
თუკი გუშინ საქართველოს ტერიტორიაზე ძლიერი ქარი დღეს, 27 იანვარს დღის მანძილზე ქარი არ იქნება.
სახლიდან გასვლა არ უნდა 26 წლის ნუცას “მინდა მთელი დღე თბილად ვიყო და სახლიდან არ გავიდე, ალბათ ასეც მოვიქცევი,” ამბობს ის.
თუმცა მას, ვისაც არ აქვს საშუალება სახლში დარჩეს, სიცივესთან შეგუება მოუწევს. მით უმეტეს, რომ მომდევნო დღეებშიც მოსალოდნელია ტემპერატურის ვარდნა, სინოპტიკოსების პროგნოზით, სიცივე საქართველოს მთელ ტერიტორიაზე, 28, 29 იანვარსაც გაგრძელდება.
ავერსის აფთიაქის მენეჯერი, გიორგი კვარაცხელია ამბობს, რომ თბილ დღეებთან შედარებით მათ ქსელში გაიზარდა გაცივების საწინააღმდეგო პრეპარატების გაყიდვა, თუმცა, მისივე თქმით, განსაკუთრებული მატება ამ დღეებში არ იგრძნობა.
სიცივესთან ბრძოლა დღეს ისევ მოუწევს გლდანში მცხოვრებ მოსახლეობას. ქვესადგურ გლდანი 220-ზე პროფილაქტიკური სამუშაოების მიზნით, ელექტრო-ენერგია გაეთიშებათ, დღის 2-დან 4 საათამდე.

ნეტგაზეთის მასალების სხვა გამოცემებში გადაბეჭდვის წესი
თამარ ჩხეიძე