დღევანდელი აქციის ორგანიზატორია “ქალთა მოძრაობა”, რომელმაც ყველა ის ქალი გააერთიანა, ვისთვისაც მნიშვნელოვანია გენდერული თანასწორობა, ქალების უფლებები და ვინც უკიდურესად შეშფოთებულია მიმდინარე წლის მანძილზე მომხდარი სულ მცირე 24 ქალის მკვლელობით, გახშირებული ოჯახური ძალადობით და ქალების მუდმივი ჩაგვრით საქართველოში.
დღევანდელ აქციას მოქალაქეების გარდა პოლიტიკოსებიც შეუერთდნენ. აქციის მონაწილეები ხელს აწერდნენ პეტიციას, რომელშიც იმ აუცილებელ ნაბიჯებზეა საუბარი, რომელიც ხელისუფლებამ ქალთა მიმართ ძალადობის შესაჩერებლად უნდა გადადგას. აქციის მონაწილეებმა სპეციალურად გაშლილ ბანერზე საღებავებით საკუთარი ხელის ანაბეჭდი დატოვეს.
25 ნოემბერს მსოფლიო ქალთა მიმართ ძალადობის აღმოფხვრის საერთაშორისო დღეს აღნიშნავს. ამავე დღეს 16-დღიანი საერთაშორისო კამპანია იწყება გენდერული ძალადობის წინააღმდეგ, რომლის მიზანიც საზოგადოებრივი ცნობიერების ამაღლებას და გენდერული ძალადობის მსხვერპლთა მიმართ სოლიდარობის დემონსტრირებაა.
