შსს საინფორმაციო-ანალიტიკური დეპარტამენტის საინფორმაციო ცენტრი ადმინისტრაციულ ავტო-საგზაო სამართალდარღვევათა 2011 წლის სტატისტიკური კვლევის შედეგებს აქვეყნებს.
სამინისტროს ინფორმაციით, კვლევის მიზანი არსებული მდგომარეობისა და ტენდენციების გამოვლენა /ანალიზი და სამომავლო განვითარების შესაძლო მიმართულებების პროგნოზირებაა.
სამართალდარღვევათა რაოდენობის მხრივ, შსს-ს ინფორმაციით, როგორც აბსოლუტური, ასევე ხვედრითი წილის მიხედვით, “ლიდერობს” თბილისი /მცხეთა-მთიანეთის რეგიონი. ამ მხრივ ყველაზე უკეთესი მდგომარეობა, კვლევის მონაცემის მიხედვით, კახეთისა და სამცხე-ჯავახეთის რეგიონებშია.
შსს ყველაზე გავრცელებული ადმინისტრაციულ სამართალდარღვევებსაც ასახელებს – სიჩქარის გადაჭარბება, უსაფრთხოების ღვედების გამოუყენებლობა ან მობილურით სარგებლობის წესების დარღვევა და სიმთვრალე.
შსს-ს ინფორმაციით, უსაფრთხოების ღვედების გამოუყენებლობა ან მობილურით სარგებლობის წესების დარღვევა მინიმალურია იმერეთის რეგიონში, რაც სამინისტროს აზრით, ჩქაროსნულ ტრასებზე ამ მიმართულებით გაძლიერებული ადმინისტრირების ეფექტიანობას უკავშირდება.
შსს თავის კვლევაში ავტო-საგზაო სამართალდარღევათა კუთხით ყურადღებას გენდერულ ფაქტორზეც ამახვილებს.
“გამოვლენილ სამართალდარღვევათა პროცენტული თანაფარდობა გენდერული კუთხით შეადგენს 91% / 9%-ზე მამაკაცების “სასარგებლოდ”.
დამრღვევთა შორის ასაკობრივი გრადაციით, როგორც ქალებში, ასევე მამაკაცებში, “ლიდერობს” 31-40 წლის პირთა სეგმენტი. თუმცა უნდა აღინიშნოს, რომ ქალებთან მიმართებაში ალკოჰოლური სიმთვრალით გამოწვეულ სამართალდარღვევების კუთხით “ლიდერობენ” 50 წელს გადაცილებული ქალბატონები,”- ნათქვამია შსს-ს კვლევის ანალიზში.