დღეს myvideo.ge-მ საქართველოს საავტორო უფლებათა ასოციაციასთან სალიცენზიო შეთანხმება გააფორმა. დღეიდან ინტერნეტ– პორტალზე განთავსებული მუსიკის, ფილმებისა და სხვა პროდუქციის საავტორო უფლებები ოფიციალურად იქნება დაცული, myvideo.ge საავტორო ჰონორარს გადაიხდის, რომელსაც შემდეგ ასოციაციის დახმარებით ავტორები მიიღებენ.

საქართველოში ავტორთა უფლებები “საავტორო და მომიჯნავე უფლებების შესახებ კანონით” რეგულირდება. მომიჯნავე და საავტორო უფლებების დარღვევასთან დაკავშირებულ ურთიერთობებს 1. საქართველოს ადმინისტრაციულ სამართალდარღვევათა კოდექსი, 2. სისხლის სამართლის კოდექსი, 3. “ინტელექტუალურ საკუთრებასთან დაკავშირებულ სასაზღვრო ღონისძიებათა შესახებ” საქართველოს კანონი არეგულირებს, რომლითაც განსაზღვრულია სპეციალური მექანიზმები კონტრაფაქციული საქონლის იმპორტისა და ექსპორტის აღკვეთის მიზნით. სწორედ ამ კანონების საფუძველზე შეიქმნა და ფუნქციონირებს საქართველოს საავტორო უფლებათა ასოციაცია, რომელიც 1999 წელს ჩამოყალიბდა საქართველოს ავტორთა და შემსრულებელთა საზოგადოების სახელით და ხელახლა დარეგისტრირდა 2006 წელს.

მომღერალ დავით ჟორჟოლაძის (ჟორა) განცხადებით, ავტორთა საზოგადოება და მისი ხელმძღვანელი ელგუჯა შაფათავა ნაკლებად იმსახურებდა ნდობას, ამიტომ მათთან ხელშეკრულება არ გაუფორმებია:

“განახლებულ საზოგადოება “საქპატენტთან” ვაპირებ თანამშრომლობას. სავარაუდოდ, myvide.ge-ზეც განვათავსებ ჩემს სიმღერებს. იყო შემთხვევა, როცა ჩემი სიმღერის არალიცენზირებული, პირატული ვარიანტი გავრცელდა, “მგზავრების” სიმღერების კრებულში ჩემი ერთ–ერთი სიმღერა “ცხელი შოკოლადი” იყო შესული, სავარაუდოდ, ავტორის სახელის მითითების გარეშე გავრცელდა და შემდეგ მიაწერეს “მგზავრებს”, – ამბობს დავით ჟორჟოლაძე.

საავტორო უფლებების ასოციაციის თავმჯდომარე გიგა კობალაძე და myvideo.ge-ს მფლობელი მამუკა მონავარდისაშვილი იმედოვნებენ, რომ სხვა ინტერნეტ–პორტალებიც მიიღებენ მსგავს გადაწყვეტილებას და საქართველოში ჯანსაღი გარემო შეიქმნება ამ კუთხით, რაც თავის მხრივ ავტორებისთვისაც წამახალისებელი იქნება.