არ ასახავს ბელარუსელი ხალხის ნებას – ტიხანოვსკაია ლუკაშენკოს ვიზიტზე

ბელარუსელი ოპოზიციონერი ლიდერი, სვეტლანა ტიხანოვსკაია, ეხმაურება ალექსანდრე ლუკაშენკოს ვიზიტს ოკუპირებულ აფხაზეთში და ამბობს, რომ ეს ნაბიჯი არ ასახავს ბელარუსელი ხალხის ნებას.

„დიქტატორი ლუკაშენკოს ვიზიტი აფხაზეთში აჩვენებს, რომ ის პოლიტიკურად გაბანკროტებულია და სრულად დამოკიდებულია რუსეთზე. ლუკაშენკო არ ასახავს ბელარუსელი ხალხის ნებას. ჩვენს გაერთიანებულ ტრანსნაციონალურ კაბინეტს საქართველოს ტერიტორიული მთლიანობისა და სუვერენიტეტის მიმართ მხარდაჭერა გაცხადებული აქვს“ ,- წერს ტიხანოვსკაია ტვიტერზე, რომელიც 2020 წლის გაყალბებული არჩევნებისას პოლიტიკური დევნის გამო ლიეტუვაში ცხოვრობს.

ბელარუსის პრეზიდენტი ალექსანდრ ლუკაშენკო ოკუპირებულ აფხაზეთში ჩავიდა. ის აფხაზეთის დე ფაქტო პრეზიდენტ ასლან ბჟანიას ბიჭვინთის აგარაკზე შეხვდა.

საქართველოს საგარეო საქმეთა სამინისტრომ დაგმო საქართველოს სახელმწიფო საზღვრის დარღვევით ალექსანდრე ლუკაშენკოს „ვიზიტი” ოკუპირებულ აფხაზეთში და ბელარუსს მოუწოდა, პატივი სცეს სუვერენული სახელმწიფოს ტერიტორიულ მთლიანობას და არ განახორციელოს ისეთი ქმედებები, რომლებიც ეწინააღმდეგება საერთაშორისო სამართლის ფუნდამენტურ პრინციპებს.

საქართველოს საგარეო საქმეთა სამინისტროში პროტესტის ნიშნად დაიბარეს ბელარუსის ელჩი ანატოლი ლისი.

ოფიციალურ უწყებებს არ განუცხადებიათ საქართველოს კანონმდებლობის დარღვევის ფაქტზე ბელარუსის პრეზიდენტის მიმართ სისხლის სამართლის საქმის აღძვრის შესახებ.

ნახეთ ლუკაშენკოს ვიზიტზე ოკუპირებულ აფხაზეთში გამოხმაურებათა ნაწილი:

• მკაცრად ვგმობ ლუკაშენკოს „ვიზიტს“ ოკუპირებულ აფხაზეთში — ღარიბაშვილი;
• ლუკაშენკომ ოკუპაციის შესახებ კანონი დაარღვია, რასაც რეაგირება მოჰყვება — კალაძე;
• მიხარია, რომ აქამდე გავაჭიანურე ბელარუსში ახალი ელჩის დანიშვნა — ზურაბიშვილი;
• UK მხარს უჭერს საქართველოს ამ პროვოკაციის ფონზე – კლეიტონი ლუკაშენკოს ვიზიტზე;
• მარგინალიზებული „ლიდერის“ სამარცხვინო ნაბიჯი — კვირიკაშვილი ლუკაშენკოზე;