დონეცკის ოლქში უკრაინული პოზიციები გაძლიერდება ორი განახლებული სამხედრო დაჯგუფებით, რომლებსაც უხელმძღვანელებენ უკრაინის ომის გმირები — დენის პროკოპენკო და ანდრი ბილეცკი.
ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა.
„ჩვენი პოზიციები დონეცკის ოლქში გაძლიერდება ორი განახლებული დაჯგუფების წყალობით. მეთაურები გახდებიან უკრაინის გმირი დენის პროკოპენკო და უკრაინის გმირი ანდრი ბილეცკი“, — თქვა ზელენსკიმ.
ფრონტზე შემდგომი ნაბიჯები ზელენსკიმ განიხილა უკრაინის შეიარაღებული ძალების ახალ მთავარსარდალ მიხაილო დრაპატისთან, გენერალური შტაბის წარმომადგენლებთან და თავდაცვის მინისტრ ევგენი ხმარასთან. ასევე, მოუსმინა საჰაერო-სადესანტო თავდასხმის ჯარების სარდლის, ოლეჰ აპოსტოლის მოხსენებას და ესაუბრა ზაპოროჟიეს მიმართულების მეთაურებს. ზელენსკის თქმით, იქ იგეგმება საჭირო საშუალებების, კერძოდ, სახმელეთო რობოტიზებული კომპლექსების რაოდენობის გაზრდა, ასევე მათი წარმოებისა და შესყიდვების გაფართოება.
გარდა ამისა, ზელენსკიმ დააანონსა უფრო სისტემური მიდგომა საშუალო მანძილზე დარტყმებისადმი და თქვა, რომ თავდაცვის მინისტრთან და მთავარსარდალთან შეათანხმა საჭირო საკადრო გადაწყვეტილებები.
მანამდე ვოლოდიმირ ზელენსკი, უკრაინის შეიარაღებული ძალების მთავარსარდალ მიხაილო დრაპატისთან ერთად, ალექსანდროვსკის მიმართულებით ფრონტის ხაზზე გაემგზავრა.