“რუსეთსა და საქართველოს შორის დიპლომატიური ურთიერთობების აღდგენის საკითხი ამჟამად დღის წესრიგში არ დგას; ინიციატივა თბილისიდან უნდა მოდიოდეს”, – განაცხადა რუსეთის საგარეო საქმეთა სამინისტროს სპიკერმა მარია ზახაროვამ ბრიფინგზე.
მან გაიხსენა, რომ რუსეთთან დიპლომატიური ურთიერთობების გაწყვეტის ინიციატორი თბილისი იყო. „შესაბამისად, დიპლომატიური ურთიერთობების აღდგენის ინიციატივაც საქართველოდან უნდა მოდიოდეს,“ – აღნიშნა მან. „ჩვენ არაერთხელ განვაცხადეთ, რომ ღია ვართ ასეთი შესაძლებლობისთვის, მაგრამ დღეს ეს საკითხი დღის წესრიგში არ დგას.“
“რუსეთთან დიპლომატიური ურთიერთობების არარსებობა „ზემოხსენებული ‘ხალხის მსახურის’, სააკაშვილის ტრაგიკული მემკვიდრეობის ნაწილია,“ – განაგრძო ზახაროვამ. „ჩვენი ურთიერთობების გაწყვეტის გადაწყვეტილება მხოლოდ შეცდომა არ ყოფილა. ეს იყო შეცდომა, რომელიც ნამდვილად დანაშაულზე უარესია – დანაშაულებრივი შეცდომა,“ – განაცხადა მან.
„დღესდღეობით, რუსეთთან თანამშრომლობას საქართველოსთვის ხელშესახები სარგებელი მოაქვს და რესპუბლიკისთვის ეკონომიკური განვითარების რეკორდულ მაჩვენებლებს უზრუნველყოფს,“ – ხაზგასმით აღნიშნა რუსეთის დიპლომატიური უწყების ოფიციალურმა წარმომადგენელმა.
საქართველომ რუსეთთან დიპლომატიური ურთიერთობები აგვისტოს ომისა და რუსეთის მიერ საქართველოს ოკუპირებული ტერიტორიების აღიარების შემდეგ, 2008 წლის 2 სექტემბერს გაწყვიტა. ამჟამად ორ ქვეყანას შორის პოლიტიკური კონსულტაციები ჟენევის დისკუსიების ფორმატში მიმდინარეობს