ვენესუელის პარლამენტის თავმჯდომარემ, ხორხე როდრიგესმა სამშაბათს განაცხადა, რომ ციხეებიდან 400-ზე მეტი ადამიანი გათავისუფლდა. როიტერის ცნობით, ეს ნაბიჯი მთავრობის მიერ გასულ კვირას დაანონსებული პროცესის ნაწილია, რომელიც „მშვიდობისკენ გადადგმულ ჟესტად“ შეფასდა.
ხორხე როდრიგესის თქმით, გათავისუფლების პროცესი მიზნად ისახავს ქვეყანაში სტაბილურობის შენარჩუნებას. მმართველი ძალა აცხადებს, რომ ქვეყანაში „პოლიტიკური პატიმრები“ არ არსებობენ და გათავისუფლებულ პირებს ბრალი ლეგიტიმური დანაშაულებისთვის ჰქონდათ წარდგენილი.
მიუხედავად მთავრობის ამ განცხადებისა, ადამიანის უფლებადამცველი ორგანიზაციები გაცილებით დაბალ ციფრებს ასახელებენ. ადგილობრივი NGO-ების მონაცემებით, დადასტურებული გათავისუფლებების რაოდენობა ამ ეტაპზე მხოლოდ 60-დან 70-მდე მერყეობს.
პატიმრების გათავისუფლების პროცესში ვენესუელაში მიმდინარე პოლიტიკური ტურბულენტობის ფონზე მიმდინარეობს, მას შემდეგ, რაც აშშ-ის სპეცსამსახურებმა ნიკოლას მადურო დააკავეს. ოპოზიციის ლიდერი და ნობელის მშვიდობის პრემიის ლაურეატი, მარია კორინა მაჩადო, რომელიც ხუთშაბათს აშშ-ის პრეზიდენტ დონალდ ტრამპთან შეხვედრას გეგმავს, აქტიურად ითხოვდა ყველა პოლიტპატიმრის გათავისუფლებას.
გათავისუფლებულთა შორის არიან როგორც ვენესუელის მოქალაქეები, ასევე უცხოელები. უფლებადამცველები აღნიშნავენ, რომ პროცესი ნელია და ინფორმაცია გათავისუფლებულთა ვინაობის შესახებ ხშირად ბუნდოვანია.
სხვადასხვა მონაცემებით, წლის დასაწყისისთვის ვენესუელის ციხეებში 800-ზე მეტი პოლიტიკური პატიმარი იმყოფებოდა. გასულ ორშაბათს ქვეყნის სასჯელაღსრულების უწყებამ განაცხადა 116 ადამიანის გათავისუფლების შესახებ, თუმცა დამოუკიდებელმა ჯგუფებმა მაშინ მხოლოდ 41 შემთხვევა დაადასტურეს. 2024 წლის არჩევნებში შემდეგ უფლებადამცველი ჯგუფები ვენესუელის ციხეებში 2000-მდე პოლიტიკურ პატიმარს ითვლიდნენ, თუმცა რეჟიმი აცხადებს, რომ მათი უმრავლესობა უკვე გაათავისუფლა.