დღეს ბიუროს სხდომაზე პარლამენტის ვიცე-სპიკერმა პაატა დავითაიამ საგარეო უწყებისგან ახალგორის რაიონში მოსახლეობის გადაადგილების მხრივ შექმნილ პრობლემებთან დაკავშირებით ევროკავშირის დამკვირვებლების ინფორმირება მოითხოვა.
დავითაია ამბობს, რომ სეპარატისტული რეჟიმი გადაადგილებისთვის მოსახლეობას ე.წ. ფორმა №9-ს სთხოვს.
“აღნიშნული დოკუმენტის არქონის შემთხვევაში, მათ საკუთარი სახლების მიმართულებით გადაადგილების შესაძლებლობა არ ეძლევათ”, – პარლამენტის ინტერნეტ გვერდი ვიცე-სპიკერის ამ ციტატას აქვეყნებს.
დეპუტატმა ახალი შეზღუდვა ეთნიკური წმენდის მორიგ გამოვლინებად შეაფასა.
პარლამენტის თავმჯდომარემ საგარეო ურთიერთობათა კომიტეტს აღნიშნული საკითხის დეტალურად შესწავლა დაავალა.