ბაქოს სასამართლომ არ დააკმაყოფილა დაცვის მხარის მოთხოვნა, შინაპატიმრობაში გაეშვათ მოშიმშილე ოპოზიციონერი თოფიგ იაგუბლუ, რომლის ჯანმრთელობის მდგომარეობაც 36-დღიანი შიმშილობის შედეგად მნიშვნელოვნად დამძიმდა. პოლიტიკოსის ადვოკატმა და თანამოაზრეებმა სასამართლოს გადაწყვეტილება გააკრიტიკეს.
გამოცემა “კავკაზსკი უზელის” ინფორმაციით, 5 მაისს, შიმშილობის 35-ე დღეს, თოფიგ იაგუბლუ ეტლით მიიყვანეს ოჯახის წევრებთან შესახვედრად, რომელთა ცნობითაც, მას უკვე უჭირს მეტყველება და მხედველობაც მნიშვნელოვნად დაკარგა, თუმცა ექიმს მასთან არ უშვებენ.
ბრალდების მიხედვით, იაგუბლუმ გერმანიაში მოქალაქეობის მიღებაში დახმარების სანაცვლოდ ელშენ ჰუსეინოვისგან 25,000 ევრო და 10,000 მანათი აიღო. თავად იაგუბლუ ამ ბრალდებას კატეგორიულად უარყოფს და აცხადებს, რომ არანაირი თანხა არ მიუღია არცერთი პირისგან. პოლიტიკოსის თქმით, არც ელშენ ჰუსეინოვთან და არც ელნურ მამედოვთან ამ საკითხზე საუბარი არ ჰქონია და აღნიშნულ საქმეში მათი ჩართვა მიზანმიმართული პროვოკაციაა.
წარსული პოლიტიკური დევნა და შიმშილობები
აზერბაიჯანში იაგუბლუ არაერთხელ ყოფილა ადმინისტრაციულ და ხანგრძლივ პატიმრობაში თავისი პოლიტიკური საქმიანობის გამო.
2013 წელს დააპატიმრეს ისმაილლის პროტესტების ორგანიზების ბრალდებით და 5 წლით თავისუფლების აღკვეთა მიესაჯა.
2017 წელს პრეზიდენტის შეწყალებით გათავისუფლდა.
2020 წელს “ხულიგნობის” ბრალდებით დააკავეს და მიუსაჯეს 4 წლითა და 3 თვით პატიმრობა. ამ განაჩენის გამოცხადებისთანავე შიმშილობა გამოაცხადა, რომელიც 17 დღე გაგრძელდა.
2021 წელს სასამართლომ შიმშილობისა და ზეწოლის ფონზე პატიმრობა პირობითით ჩაანაცვლა.
2025 წლის 10 მარტს კი ბაქოს მძიმე დანაშაულთა სასამართლომ 9 წლით პატიმრობაში დატოვა.
სწორედ ამ უკანასკნელ განაჩენზე პროტესტის ნიშნად თოფიგ იაგუბლუმ შიმშილობა 2025 წლის 1 აპრილს დაიწყო.
აზერბაიჯანის ხელისუფლება კი კვლავ უარყოფს ქვეყანაში პოლიტიკური პატიმრების არსებობას და აცხადებს, რომ ყველა პატიმარი მათი მიერ ჩადენილი დანაშაულისთვის იდევნება და არ არსებობს პოლიტიკურად მოტივირებული დევნა.
