ორშაბათ დილას რუსეთში, ორ ავიაბაზაზე აფეთქებების შესახებ ვრცელდება ინფორმაცია.
სარატოვის ოლქში, ქალაქ ენგელსში მდებარე სამხედრო ავიაბაზაზე ჯერჯერობით დაუდგენელი საფრენი აპარატის „ჩამოვარდნის“ შედეგად ორი სტრატეგიული ბომბდამშენი, TU-95 დაზიანდა.
ამ დილას აფეთქება მოხდა რუსეთის კიდევ ერთ ქალაქში, რიაზანში მდებარე ავიაბაზაზე. „რია ნოვოსტის“ ცნობით, „საწვავის კონტეინერის აფეთქების შედეგად სამი ადამიანი დაიღუპა და 6 დაიჭრა“.
TU-95 (რომლებიც ენგელსის ავიაბაზაზე დაზიანდა) არის მძიმე სტრატეგიული ავიაციის თვითმფრინავი, რომელიც ერთიანდება რუსეთის შეკავების ძალების „ბირთვულ ტრიადაში“.
ენგელსი უკრაინის საზღვრიდან დაახლოებით 800 კმ-ითაა დაშორებული.
ინფორმაციას ტელეგრამ არხები, მათ შორის ASTRA, NEXTA და BAZA, ავრცელებენ.
In #Saratov region, #Russia, a drone attacked a military airfield, damaging two Tu-95 strategic bombers.
Two people were injured. pic.twitter.com/nRNz8j7CFL
— NEXTA (@nexta_tv) December 5, 2022
Baza-ს ცნობითვე, დაშავდა ერთი პირი, სავარაუდოდ, სამხედრო მოსამსახურე, ASTRA კი ორ დაშავებულ სამხედრო მოსამსახურეზე ავრცელებს ინფორმაციას.
რამდენიმე დღის წინ უკრაინული მედია წერდა, რომ უკრაინის ტერიტორიებს ენგელსის საჰაერო ბაზიდან მომავალი Tu-95 გამანადგურებლები უტევდნენ. პირველ დეკემბერს გავრცელდა ინფორმაცია,- რაც Maxar-ის სატელიტურ ფოტოებს ეყრდნობოდა, სადაც ბაზაზე „განსაკუთრებით მაღალი აქტივობა“ ჩანდა, – რომ ენგელსის სამხედრო ბაზიდან რუსეთი ძლიერი საჰაერო შეტევისთვის ემზადებოდა.
„რადიო თავისუფლების“ თათრეთ-ბაშკირეთის განყოფილება, „იედლ რეალიი“ იუწყება, რომ ენგელსისა და სარატოვის მცხოვრებლები სოციალურ ქსელებში წერენ, რომ დილის 6 საათისათვის ძლიერი აფეთქების ხმა გაიგეს.