პრიორიტეტად განიხილეთ საქართველოდან საქმეები ფარულ მიყურადებაზე – ომბუდსმენი სტრასბურგს

საქართველოს სახალხო დამცველი მიმართავს ადამიანის უფლებათა ევროპულ სასამართლოს და სთხოვს, პრიორიტეტულად განიხილოს საქართველოდან გაგზავნილი განაცხადები პირადი ცხოვრების თაობაზე, რომელიც ეხება ფარულ მიყურადებას.

სახალხო დამცველი განცხადებით გამოეხმაურა „ტვ პირველის“ ეთერში გასულ სიუჟეტს, რომელიც ეხებოდა მორიგ, სავარაუდოდ, ფარულ მოსმენებს სახელმწიფო უსაფრთხოების სამსახურის მხრიდან 2020-2021 წლებში.

„პირველ რიგში გვსურს აღვნიშნოთ, რომ ჩანაწერის გავრცელებიდან 3 დღის შემდეგაც სახელმწიფო უსაფრთხოების სამსახურს არ გაუვრცელებია განცხადება და არ უარუყვია ის, რომ ჩანაწერში მოხსენიებული პირები არ მუშაობენ მათ სისტემაში. აღნიშნული კი ჟურნალისტების მიერ გაცხადებულ ინფორმაციას მეტ სანდოობას სძენს.

მასობრივი უკანონო სახელმწიფო მიყურადება-თვალთვალის პირობებში შეუძლებელი ხდება ადამიანის უფლებების ჯეროვანი რეალიზება. თავისუფალი არჩევნების ჩატარება, სამართლიანი სასამართლოს არსებობა, დამოუკიდებელი ინსტიტუტების ფუნქციონირება, სამოქალაქო სივრცე აქტივისტებისთვის და სხვა უფლებებით თავისუფალი სარგებლობა – ეს ყველაფერი გამოირიცხება, როდესაც პირადი ცხოვრების დაკვირვების ასეთი მასშტაბია სახეზე“.

განცხადებაში ნათქვამია, რომ სიუჟეტში წარმოდგენილი პირადი ცხოვრების მასშტაბური და ტოტალური კონტროლის ლეგიტიმური მიზანი შეუძლებელია არსებობდეს და გამართლდეს რამე სახელმწიფოებრივი ან საჯარო მიზნით – „ცალკე აღნიშვნის ღირსია სახელმწიფო ორგანოების წარმომადგენელთა პოლიტიზების მასშტაბი, რომელიც გავრცელებულ ჩანაწერებში ნათლად იდენტიფიცირდება და სახელმწიფოს წარმომადგენელი კონკრეტულ პოლიტიკურ პარტიასთან აიგივებს თავს,“.

ამასთანავე, სახალხო დამცველი წერს:

შაბათს „ტვ პირველის“ ეთერში ჟურნალისტური გამოძიება გავიდა, რომელიც ეხებოდა მორიგ, სავარაუდოდ, ფარულ მოსმენებს სახელმწიფო უსაფრთხოების სამსახურის მხრიდან 2020-2021 წლებში. სიუჟეტში ნაჩვენები იყო არაერთი ფოტო, ვიდეო და აუდიოჩანაწერი, რომელიც პოლიტიკოსთა პირად ცხოვრებას ეხებოდა. სიუჟეტის თანახმად, სუსი იყენებს სხვადასხვა საშუალებას, მათ შორის ჩანერგილ ჯაშუშებს, იმისათვის, რომ მიიღოს ცნობები ოპოზიციონერების გადაადგილების, გეგმების და ექიმთან ვიზიტების თაობაზეც კი.

პროკურატურა არ ამბობს, დაიწყო თუ არა გამოძიება “სუს-ის ახალ ფაილებზე”