სასამართლომ სუს-ის ყოფილი მაღალჩინოსნის, სოსო გოგაშვილის დაცვის ყოფილ უფროსს, ალექსანდრე სამხარაძეს აღკვეთის ღონისძიების სახით 3 000-ლარიანი გირაო შეუფარდა.
სამხარაძის ადვოკატმა რამაზ ჩინჩალაძემ „ნეტგაზეთს“ განუცხადა, რომ პროკურატურა ითხოვდა 5 000-ლარიან გირაოს, თუმცა მოსამართლემ მოთხოვნა ნაწილობრივ დააკმაყოფილა.
პროკურატურა სამხარაძეს საბრძოლო მასალის უკანონო შეძენა/შენახვას ედავებოდა.
სახელმწიფო უსაფრთხოების სამსახურის უფროსის ყოფილი მოადგილე სოსო გოგაშვილი 16 ივლისს საკუთარ სახლში, სამი ბრალდებით დააკავეს. გამოძიება მას ედავება პერსონალური მონაცემების ხელყოფას, უფლებამოსილების გადამეტებასა და ცეცხლსასროლი იარაღის უკანონო შეძენა-შენახვას. გოგაშვილი თავს პოლიტიკურ პატიმრად მიიჩნევს.