ქარელის მუნიციპალიტეტის სოფელ საციხურში მანქანა 12 წლის მოზარდს დაეჯახა, რომელიც ველოსიპედით გადაადგილდებოდა. ინფორმაცია ამის შესახებ „ნეტგაზეთს“ საქართველოს შინაგან საქმეთა სამინისტროში დაუდასტურეს.
შემთხვევა გუშინ, 8 აგვისტოს, მოხდა. ადგილობრივი მედიის ინფორმაციით, ბავშვი ადგილზე დაიღუპა.
შსს-ში ამ დრომდე არ აკონკრეტებენ ინფორმაციას, დაიწყო თუ არა მომხდარზე გამოძიება და რა მუხლით.
Qartli.ge-სთან სოფლის რწმუნებული აცხადებს, რომ გამოძიება დაიწყო, თუმცა სხვა დეტალები მისთვის უცნობია:
„ძალიან მძიმე ფაქტი მოხდა სოფელში, პოლიციელებმა გამოძიება დაიწყეს, სხვას ცერაფერს გეტყვით“, – ამბობს რწმუნებული Qartli.ge-სთან.
გამოცემა წერს, რომ წინასწარი ინფორმაციით, მოზარდი საციხური-აბანოს გზაზე მოძრაობდა, რა დროსაც მანქანის სარკე ველოსიპედს მოედო, მოზარდი წაიქცა და მძიმე ტრავმა თავის არეში მიიღო.