ახალი ამბები

მიმართეთ EU-ს წევრობაზე – გახარია მთავრობას

28 თებერვალი, 2022 • 1262
მიმართეთ EU-ს წევრობაზე – გახარია მთავრობას

საქართველოს ყოფილი პრემიერ-მინისტრისა და პარტიის „საქართველოსთვის“ ლიდერის, გიორგი გახარიას განცხადებით, საქართველოს მთავრობამ უნდა მიმართოს ევროკავშირს, რათა ქვეყანა კავშირში დაჩქარებული წესით მიიღონ.

„ხელისუფლებას შევახსენებთ, რომ საქართველოს მოსახლეობამ უკვე გააკეთა არჩევანი – ჩვენი ადგილი ევროპულ ოჯახშია! სწორედ ეს არის ჩვენი ეროვნული ინტერესი და ჩვენი დიდი წინაპრების საუკუნოვანი მიზანი და ოცნება.
დღეს ეს არჩევანი მარტივია – ან გავხდებით ევროპული ოჯახის, თავისუფალი სამყაროს ნაწილი, ან დავბრუნდებით რუსულ საბჭოთა კავშირში.

მოვუწოდებ საქართველოს ხელისუფლებას, გამოიყენოს ეს ისტორიული შანსი და ოფიციალური თხოვნით მიმართოს ევროკავშირს საქართველოს დაჩქარებული წესით მიღებასთან დაკავშირებით. აქტიური მოქმედების დროა, უნდა შევახსენოთ მთელ მსოფლიოს, რომ ჩვენ რუსული აგრესიის პირველი მსხვერპლი ვართ, რომ რუსეთის აგრესია ჩვენი ტერიტორიების ოკუპაციით დაიწყო და რუსეთის აგრესიაზე სწორი პასუხი საქართველოს და უკრაინის ევროპულ ოჯახში დაუყოვნებლივი მიღებაა.

ეს არის ჩვენი ვალი წინაპრების და მომავალი თაობების წინაშე! ეს არის ჩვენი ვალი საქართველოს თავისუფლებისთვის და დამოუკიდებლობისთვის დაღუპული ჩვენი მოქალაქეების ღირსების დასაცავად“, – აცხადებს გახარია.

გახარიას განცხადებით, საქართველოს მთავრობის პოზიცია აზიანებს ქვეყნის ეროვნულ ინტერესებს.

„რუსეთის აგრესიაზე მსოფლიოს უპრეცედენტო რეაქციის პარალელურად, საქართველოს ხელისუფლება იკავებს პოზიციას, რომელიც პირდაპირ აზიანებს ჩვენი ქვეყნის ეროვნულ ინტერესებს, ეწინააღმდეგება ქართველი ხალხის ნებას და ჩვენ შვილებს უსპობს ღირსეული მომავლის პერსპექტივას.

საქართველოს ხელისუფლების ყოველი ახალი გამოსვლა შეურაცხყოფს ქართველი ხალხის ღირსებას და ქვეყნის ერთიანობისთვის, თავისუფლებისთვის 2008 წელს გაღებულ მსხვერპლს“, – აცხადებს გახარია.

უკრაინული მხარის განცხადებით, ისინი ევროკავშირს დაჩქარებული წესით წევრად გახდომის შესახებ მიმართავენ.

 

მასალების გადაბეჭდვის წესი