სახალხო დამცველი, ნინო ლომჯარია ფეისბუქის საკუთარ გვერდზე გამოეხმაურა მმართველი პარტიის მხრიდან დღეს, 25 ოქტომბერს “ქართული ოცნების” წარმომადგენლების მხრიდან მის მიმართ გაკეთებულ განცხადებებს.

“დღის ბოლოს, მოკლედ რომ შევაჯამო განვითარებული მოვლენები:

• სახალხო დამცველმა აიღო ხელისუფლოების მიერ შექმნილი კონსილიუმის დასკვნა, რომლის თანახმადაც მიხეილ სააკაშვილის ჰოსპიტალიზაცია უნდა განხორციელდეს ისეთ კლინიკაში, სადაც იქნება მრტ, კტ, დუპლერ სკანირების აპარატი;
• ექსპერტები წავიდნენ ციხის საავადმყოფოში და შეამოწმეს, იყო თუ არა ადგილზე აღნიშნული აპარატურა;
• აღმოჩნდა, რომ არ იყო, რის შესახებაც საჯაროდ დავწერეთ;

ამას მოჰყვა შემდეგი რეაქციები:

• დეპუტატმა ალუდა ღუდუშაურმა განაცხადა, რომ სახალხო დამცველი არის პოლიტიკურად მიკერძოებული;
• ბ-ნმა ირაკლი კობახიძემ განაცხადა, რომ აღარ დაუშვებენ, რომ სახალხო დამცველი აღარ იყოს პარტიის კონტროლის ქვეშ;
• დედაქალაქის მერმა ნერვიულად გადაიხარხარა…

რა შეიძლება ვთქვა? კაი, ჩემო ძმაო, გასაგებია ყველაფერი…”, – დაწერა ლომჯარიამ.

გუშინ, 24 ოქტომბერს ლომჯარიამ განაცხადა, რომ ციხის საავადმყოფო სააკაშვილის ჯანმრელობის შესახებ გაცემულ რეკომენდაციებთან შეუსაბამოა და არსებობს უსაფრთხოების რისკიც. ეს განცხადება ლომჯარიამ N18 სამკურნალო დაწესებულების შემოწმების შემდეგ გააკეთა.

სახალხო დამცველის თქმით, მონიტორინგმა ცხადყო, რომ იმ შემთხვევაში, თუ მოხდება მიხეილ სააკაშვილის გადაყვანა N18 სამკურნალო დაწესებულებაში, იმ სამედიცინო მომსახურების მიღება, რისი შესაძლო საჭიროებაც განისაზღვრა ექიმთა მულტიფუნქციური ჯგუფის მიერ, ვერ შესრულდება ადგილზე და საჭირო იქნება პერიოდულად მისი გადაყვანა სამოქალაქო ტიპის კლინიკაში.

იმ გარემოების გათვალისწინებით კი, რომ პრაქტიკულად შეუძლებელია ხანგრძლივად მოშიმშილე პატიმრის ჯანმრთელობის მდგომარეობის ცვლილებისა და დამძიმების სრულფასოვანი წინასწარი პროგნოზირება, ვითარების კრიტიკულად შეცვლის შემთხვევაში, სახალხო დამცველის თქმით, შესაძლოა პაციენტის გაყვანის პერიოდში საკმაოდ მძიმე ან გამოუსწორებელი შედეგები დადგეს.

დღეს, 25 ოქტომბერს კი, თბილისის მერმა, კახა კალაძემ ჟურნალისტების მიერ აღნიშნულ საკითხზე დასმულ შეკითხვას უპასუხა: “სახალხო დამცველი თუ უარყოფს, მიღებულია, ძმაო. სახალხო დამცველმა თუ უარყო, კაი”.