პირდაპირი აღიარებაა პრემიერისგან, რომ სააკაშვილის საქმე პოლიტიკურია – ევროპარლამენტარი

ევროპარლამენტარი რასა იუკნევიჩიანე აცხადებს, რომ მიხეილ სააკაშვილთან დაკავშირებით პრემიერ-მინისტრ ირაკლი ღარიბაშვილის განცხადება პირდაპირი აღიარებაა, რომ მისი საქმე პოლიტიკურია.

საუბარია ღარიბაშვილის განცხადებაზე, რომ სააკაშვილი “წესიერად მოიქცეს”, თორემ კიდევ სხვა მუხლებს დაუმატებენ.

“ეს არის პირდაპირი აღიარება საქართველოს პრემიერ-მინისტრის მხრიდან, რომ სააკაშვილის წინააღმდეგ საქმე პოლიტიკურია. სავალალო და შეუთავსებელია ევროკავშირის ასოცირებული ქვეყნის სტატუსთან”, – წერს ტვიტერზე რასა იუკნევიჩიანე.

“წესიერად მოიქცეს, თორემ დავუმატებთ კიდევ სხვა მუხლებს და სხვებსაც მივაყოლებთ”, – ეს განცხადება პრემიერ-მინისტრმა ირაკლი ღარიბაშვილმა ექსპრეზიდენტ მიხეილ სააკაშვილის მისამართით გააკეთა.

იმედის ეთერში საუბრისას ღარიბაშვილს გააცნეს სააკაშვილის წერილი ნიკა მელიასადმი, რომელიც მან ზემოხსენებული კომენტარით შეაფასა.