გადაადგილებაზე შეზღუდვა დღეს, ერთი ღამით, გაუქმებულია
დღეს, 6 იანვარს, საღამოს 21.00 საათიდან მხოლოდ ერთი ღამით მოიხსნება გადაადგილებაზე დაწესებული შეზღუდვა მთელ საქართველოში. ეს გამონაკლისი მთავრობამ შობის დღესასწაულის გამო დაუშვა.
7 იანვრის დილიდან ეს შეზღუდვა კვლავ ძალაში შევა, რაც იმას ნიშნავს, რომ თუ მოქალაქე საშვის გარეშე 21:00 საათიდან დილის 05:00 საათამდე გარეთ გადაადგილდება, შესაძლოა 2 000 ლარით დააჯარიმონ.
გადაადგილებაზე შეზღუდვა კოვიდ 19-ის პანდემიის გამო საქართველოს მთავრობამ საქართველოში 28 ნოემბრიდან შემოიღო და გამონაკლის დღეებად ახალი წლის ღამე და 6 იანვარი დაასახელა.
საქართველოს მთავრობამ ერთდღიანი გამონაკლისი მართლმადიდებლური შობის დღესასწაულისთვის დაუშვა, თუმცა სხვა კონფესიებისთვის იგივე არ გაუკეთებია.
ამ გადაწყვეტილებას არასამთავრობო სექტორში უთანასწორო მოპყრობად აფასებენ, ლათინ კათოლიკეთა კავკასიის სამოციქულო ადმინისტრატორმა, ეპისკოპოსმა ჯუზეპე პაზოტომ მთავრობის მიერ დაწესებულ შეზღუდვებს კი “აშკარა დისკრიმინაცია” უწოდა.
რაც შეეხება მართლმადიდებელი ეკლესიის საპატრიარქოს, აქ ამბობენ, რომ კორონავირუსის გამო შობა დღეს „ალილოს“ მსვლელობა არ ჩატარდება, ხოლო საშობაო წირვა, რომელსაც ილია მეორე აღავლენს, 23:00 საათზე დაიწყება.
ამავე თემაზე ნახეთ: