ქუთაისში, დასავლეთ საქართველოს სამედიცინო ცენტრიდან, ასაკოვანი პაციენტი დაიკარგა. მას უკვე მე-4 დღეა ეძებენ, მაგრამ უშედეგოდ.

77 წლის ანზორ ლემონჯარიას შვილიშვილი ფეისბუკზე განცხადებას აქვეყნებს, რომელშიც ამბობს, რომ კაცი ბოლოს 27 ნოემბერს, ქუთაისში, ყინულის მოედანთან ნახეს, შემდეგ კი მისი კვალი ქრება.

„ჩაცმულობა: შავი ქუდი, შავი სვიტრი, შავი შარვალი და თბილი ჩუსტები. მცირე ინფორმაციაც მნიშვნელოვანია, გთხოვთ, პოვნის შემთხვევაში სასწრაფოდ დამიკავშირდით, 551 66 66 19“, – წერს ოჯახის წევრი.

როგორც კლინიკის იურისტი არმაზ ხელიძე ჟურნალსიტებთან ამბობს, სამედიცინო პროცედურების შემდეგ პაციენტი დაკვირვების პალატაში მოათავსეს. ის კონტაქტური იყო, თუმცა დაახლოებით 22:35 საათზე პაციენტი განყოფილებაში აღარ იმყოფებოდა.

„უკანა კარიდან დატოვა საავადმყოფო. საქმეში ჩაერთო შიდა უსაფრთხოების სამსახური, მოვძებნეთ საავადმყოფოს შიდა ტერიტორიაზე, შემდეგ შევატყობინეთ პოლიციას“, – ამბობს ის ჟურნალისტებთან.

შსს-ში ამბობენ, რომ მოხუცებულ კაცს პოლიცია ჯერ კიდევ ეძებს.