სვანეთში დაკარგული 13 წლის ილია ფილფანის ოჯახი ბავშვის მპოვნელისთვის ან სასარგებლო ინფორმაციის მიმწოდებლისთვის ფულად ჯილდოს აწერებს.
ოჯახმა დღეს სპეციალური პრესკონფერენცია გამართა, სადაც განაცხადეს, რომ ბავშვის დაკარგვიდან 2.5 თვე გავიდა და, მართალია, მიმდინარეობს საგამოძიებო და სამძებრო მოქმედებები, სამართალდამცველებს საკმარისი ინფორმაცია არ აქვთ.
ილია ფილფანის დედა ყვება, რომ განსაკუთრებული ყურადღება ეთმობა ზემო სვანეთის რეგიონს, კერძოდ, მესტია-ჯვრის გზას, სადაც ბავშვი ბოლოს ნახეს.
„თუ თქვენ ფლობთ რაიმე ინფორმაციას ბავშვის ადგილსამყოფელთან დაკავშირებით და ეს ინფორმაცია დადასტურდება, ჩვენ მზად ვართ, 50 000 ლარი გადავიხადოთ.
ნებისმიერი ინფორmაციითსვის, რომელიც დაეხმარება ბავშვის პოვნას ან გაგვიყვანს იმ ადამიანებამდე, რომლებსაც რაიმე წვლილი მიუძღვით მის გაუჩინარებაში, ჩვენ მზად ვართ, გადავიხადოთ 30 ათასი ლარი“, – ამბობს ილია ფილფანის დედა, ქსენია ფილფანი.
ილიას დედა ამბობს, რომ მპოვნელის კონფიდენციალურობას დაიცავენ, ოჯახთან კონტაქტზე გასვლა კი ყველა საშუალებითაა შესაძლებელი, მათ შორის, ელექტრონული ფოსტით, ტელეფონით თუ სოციალური ქსელებით.
მშობლებმა დაადასტურეს, რომ ფილფანს ინტერპოლი ეძებს, ჟურნალისტის კითხვაზე, ხომ არ აქვთ ეჭვი, რომ მათი შვილი გაიტაცეს, ქსენია ფილფანი პასუხობს:
„ჩვენ გვინდა გამოვიყენოთ ყველა შესაძლო საშუალება, რათა ჩვენი შვილი ვიპოვოთ. თუ იმის მინიმალური შანსი მაინც არსებობს, რომ ის სადღაც საზღვარგარეთაა, ჩვენ გვინდა ეს შესაძლებლობა და ყველანაირი რესურსი გამოვიყენოთ“, – ამბობს ქსენია ფილფანი.
ილია ფილფანი 18 ივლისს დაიკარგა. როგორც ოჯახი ამბობს, ბავშვი სახლიდან გავიდა, თუმცა, უკან არ დაბრუნებულა. მოზარდის ძებნაში ჩართულნი არიან მაშველები, ტერიტორია კი რამდენჯერმე დაათვალიერეს ვერტმფრენით.
ამასთანავე, ოჯახის ორგანიზებით, გაიკრა განცხადებები ილია ფილფანის დაკარგვის შესახებ, ხოლო ყველა აქტიურ ნომერზე საქართველოში შსს-მ შეტყობინება გააგზავნა. ამ შეტყობინებებში ბავშვის მონაცემები და იმ დროისთვის არსებული ბოლო ინფორმაცია ეწერა.
გაუჩინარებული ილია ფილფანის ოჯახი მოზარდის გატაცების ვერსიას არ გამორიცხავს