საზოგადოებრივი მაუწყებელი კოსტავას გამზირზე მდებარე შენობას აუქციონზე ყიდის.
ქონების საწყისი ღირებულება 122 432 000 ლარია. თბილისში, კოსტავას გამზირზე მდებარე გასაყიდი მიწის ფართობი 33 209 კვ.მ შეადგენს, ხოლო შენობა-ნაგებობები 23 649 კვ.მ-ია. აუქციონის პირობების მიხედვით, შენობით სარგებლობას მყიდველი 2023 წლიდან შეძლებს, ანუ მას შემდეგ, რაც საზოგადოებრივი მაუწყებლის ახალი შენობის მშენებლობა დასრულდება და ტელევიაზია ამ შენობაში გადავა. ამას გარდა, მყიდველი თანხას შემდეგი პირობებით გადაიხდის:
- გასაყიდი ქონების საფასურის პირველი ნაწილი – 40 პროცენტი გადახდილი უნდა იქნას აუქციონის დასრულებიდან (გამარჯვებულის გამოვლენიდან) 30 (ოცდაათი) კალენდარული დღის ვადაში;
- გასაყიდი ქონების საფასურის მე-2 ნაწილი – 10 პროცენტი გადახდილი უნდა იქნას 2021 წლის პირველ ივლისამდე;
- გასაყიდი ქონების საფასურის მე-3 ნაწილი – 25 პროცენტი გადახდილი უნდა იქნას 2022 წლის 31 დეკემბრამდე;
- გასაყიდი ქონების საფასურის მე-4 ნაწილი – 25 პროცენტი გადახდილი უნდა იქნას 2023 წლის პირველ აპრილამდე;
პირველმა არხმა ახალი შენობის მშენებლობის ტენდერი გამოაცხადა. მაუწყებლის თქმით, პირველი არხის ახალი შენობა პოლიტკოვსკაიას 31 ნომერში იქნება განთავსებული. არხმა მშენებლობის ნებართვა, ორწლიანი სამუშაოების ჩატარების შედეგად, დედაქალაქის მერიის არქიტექტურის სამსახურისგან 28 მაისს მიიღო.
ტენდერის მიხედვით, მომსახურების სავარაუდო ღირებულება 46 755 039 ლარია, მშენებლობის ზედამხედველობისთვის საქართველოს პირველმა არხმა, ასევე ტენდერის მეშვეობით, დაიქირავა კომპანია „სიემსი“, რომელიც იქნება ჩართული პროექტის მართვაში.
პირველმა არხმა ახალი შენობის ასაშენებლად 47-მილიონიანი ტენდერი გამოაცხადა
