გამოცემის თანახმად, გასული წლის მონაცემებით, საუბარია 190 ტრილიონ ირანულ რიალზე. ქვეყნის ეროვნული ვალუტის მკვეთრი გაუფასურება აღნიშნული თანხის აშშ დოლარში წარმოდგენას ართულებს, თუმცა ამჟამინდელი კურსით, ინტერნეტის ალტერნატიული ქსელის შექმნისათვის დახარჯული თანხა, სულ მცირე, 4.5 მილიარდ აშშ დოლარს შეადგენს.
ირანის ისლამური რესპუბლიკის ხელისუფლება ინტერნეტის საერთაშორისო ქსელთან (www) კავშირს ბოლო 20 წლის მანძილზე სხვადასხვა ფორმით ზღუდავს, თუმცა იდეა ქსელის შექმნისა, რომელიც მხოლოდ ირანში იმუშავებს, მკვეთრი კონსერვატიულობითა და რადიკალურობით გამორჩეული პრეზიდენტის, მაჰმუდ აჰმადინეჟადის მმართველობისას, 2005 წელს გაჩნდა.
Radio Farda-ს თანახმად, ალტერნატიული ინტერნეტის შექმნის კუთხით ქვეყნის სულიერი ლიდერი ალი ხამენეი მეტ პროგრესს მოელის. მან კრიტიკაც გაახმიანა ამ მიმართულებით მუშაობის სიმცირის გამო.
ალტერნატიული ქსელის ფარგლებში, ხელისუფლებას მეტად გაუადვილდება ცენზურა, ვინაიდან აღნიშნული სისტემა წვდომას მხოლოდ ნებადართულ მასალებზე უზრუნველყოფს. VPN-ის ქსელი, რომელსაც მრავალი ირანელი იყენებს ხელისუფლების შეზღუდვებისათვის გვერდის ავლისა და დაბლოკილი ვებგვერდების გამოყენების მიზნით, ახალი ქსელის პირობებში ვერ იფუნქციონირებს.
ქვეყნის პრეზიდენტი ჰასან რუჰანი მიიჩნევს, რომ იდეის განხორციელების შემთხვევაში, “ხალხს არ დასჭირდება უცხოური [ქსელების] გამოყენება საკუთარი საჭიროებების დასაკმაყოფილებლად”.
პროექტის დადებით კუთხით წარმოჩენას რუჰანის ადმინისტრაციის სხვა წევრებიც ცდილობენ. ერთ-ერთი მათგანი, Radio Farda-ს თანახმად, პროექტს კიბერ სივრცეში დამოუკიდებლობის საშუალებად წარმოაჩენს და აღნიშნავს, რომ ეს არ გულისხმობს “ქვის ხანაში ცხოვრებას”.
ირანის ხელისუფლება ინფორმაციის კონტროლს დიდ ყურადღებას უთმობს. რადიოს თანახმად, ქვეყანაში დაბლოკილია “ათასობით თუ არა, მილიონობით ვებგვერდი”. 2019 წლის ნოემბერში, როდესაც ქვეყანაში ანტისამთავრობო დემონსტრაციები დაიწყო, ხელისუფლებამ ინტერნეტზე კონტროლი თითქმის მთლიანად შეზღუდა.