აშშ-ის პრეზიდენტმა დონალდ ტრამპმა ტვიტერზე გააზიარა პოსტი, რომლითაც აშშ-ის ალერგიისა და ინფექციური დაავადებების ეროვნული ინსტიტუტის ხელმძღვანელის, ენტონი ფაუჩის გადადგომას ითხოვენ.
როგორც „ნიუ-იორკ ტაიმზი“ (New-York Times) წერს, ამ ტვიტით ტრამპმა გამოხატა, რომ „იმედგაცრუებულია“.
ფაუჩიმ ცოტა ხნით ადრე განაცხადა, რომ აშშ-ს უფრო ადრე რომ მიეღო შესაბამისი ზომები, კორონავირუსი ნაკლებ ადამიანს შეიწირავდა. ოფიციალური სტატისტიკის თანახმად, ქვეყანაში 22 ათასზე მეტი ადამიანი დაიღუპა Covid 19-ით.
Sorry Fake News, it’s all on tape. I banned China long before people spoke up. Thank you @OANN https://t.co/d40JQkUZg5
— Donald J. Trump (@realDonaldTrump) April 12, 2020
პოსტი, რომელიც ტრამპმა გააზიარა, ეკუთვნის რესპუბლიკური პარტიის წევრ დიანა ლორეინს, რომელიც კონგრესის წევრობის ყოფილი კანდიდატია.
„ფაუჩი 29 თებერვალს ხალხს ეუბნებოდა, რომ არაფერი იყო სანერვიულო და Covid-19 დიდად არ უქმნიდა საფრთხეს აშშ-ს. დროა, რომ ფაუჩი დაითხოვონ“, – წერს იგი.
ტრამპა ეს პოსტი გააზიარა და დაწერა: „ვწუხვარ, ყალბი ახალი ამბების შემქმნელებო. ყველაფერი ჩაწერილია. ჩინეთთან მიმოსვლა იმაზე დიდი ხნით ადრე ავკრძალე, ვიდრე ხალხი [პანდემიაზე] საუბარს დაიწყებდა“.
ენტონი ფაუჩი დონალდ ტრამპს არაერთ საკითხში არ ეთანხმება, მათ შორის ვაქცინის დამზადების დროზე;
უთანხმოების კიდევ ერთი საკითხი მალარიის სამკურნალო პრეპარატი ჰიდროქსიქლორინია – პრეზიდენტმა გასცა რეკომენდაცია, კორონავირუსით ინფიცირებულებმა გამოიყენონ ეს პრეპარატი, რასაც ფაუჩი ასევე არ ეთანხმება, რადგან მისი ეფექტურობა Covid 19-ის წინააღმდეგ დადასტურებული არ არის. დაავადებათა კონტროლის და პრევენციის ცენტრმა (CDC) ვებგვერდიდან წაშალა რეკომენდაცია ამ წამლის გამოყენების შესახებ.
საზოგადოებრივი აზრის გამოკითხვების თანახმად, მოქალაქეები ექიმ ფაუჩის უფრო ენდობიან, ვიდრე პრეზიდენტ ტრამპს.