“ერის მამის გადაგდებას არ შეგარჩენთ” – აქცია-პერფორმანსი ხუნდაძის წინააღმდეგ

მოძრაობა “20/30-იანელების” წარმომადგენლებმა მცხეთის გამგეობასთან მცხეთის მაჟორიტარი დეპუტატის, დიმიტრი ხუნდაძის საწინააღმდეგო აქცია-პერფორმანსი გამართეს.

აქციაზე “20/30-იანელებს” მიტანილი ჰქონდათ პლაკატები წარწერებით:

• “დიმიტრი, ბიძინა დაიკრძალება მთაწმინდაზე, შენ – ძეგვში”
• “გახსოვდეს, ვინ გაქცია კაცად”
• “ერის მამის გადაგდებას არ შეგარჩენთ”
• “სასიკვდილო მე ვარ მხოლოდ, რომ კაცად ვერ გამიზრდიხარ”

“ხუნდაძემ იუდასავით გაყიდა ივანიშვილი და ამ დიდებულ ადამიანს ისტორიული გადაწყვეტილების მიღებაში ხელი შეუშალა”, – განაცხადეს მოძრაობის წევრმა.

“გირჩის” სამოქალაქო აქტივისტების მოძრაობა “20/30-იანელები” პარალელურად ბიძინა ივანიშვილის მთაწმინდაზე დაკრძალვის მოთხოვნით ხელმოწერებსაც აგროვებენ. ამ მოთხოვნით ისინი ორბელიანის მოედანზე, “ქართული ოცნების” ორგანიზებულ კონცერტზეც იმყოფებოდნენ ბანერით: “100 კონცერტი ხალხს 2030 წლამდე”.