საპარლამენტო უმრავლესობის წევრი, ალექსანდრე ერქვანია, თბილისი პრაიდის ჩატარებასთან დაკავშირებით, ჰომოფობიურ განცხადებას ავრცელებს და აღმასრულებელი ხელისუფლების სხვადასხვა უწყებებს მოუწოდებს, არ დაუშვან თბილისი პრაიდის ჩატარება.

“ქვეყანაში დაანონსებული LGBTQI პრაიდის ჩატარება, რომელიც თურმე ე.წ. ღირსების მარშით უნდა დასრულდეს, საქართველოს მოსახლეობის დაცინვა და შეურაცხყოფაა. ეს არის მიზანმიმართული პროვოკაცია და მცდელობა ქართველი ერის ღირსების შელახვის. მივმართავ საქართველოს მთავრობას, მიუხედავად გარე თუ შიდა ძალების მხრიდან მიმდინარე არნახული ზეწოლისა, არ დაუშვას ქვეყანაში უზნეობის პროპაგანდა და გეი აღლუმი. სხვა შემთხვევაში, ქართველი ხალხი თვითონ აღკვეთავს დაანონსებულ უზნეობას და დაიცავს ქვეყნის ღირსებას, რაც აუცილებლად გამოიწვევს არეულობასა და ქაოსს.

ვინც დღეს მხარდაჭერას უცხადებს გეი აღლუმის ჩატარებას, პროვოცირებას უკეთებს ქვეყანაში არეულობასა და დესტაბილიზაციას. ყველას მოვუწოდებ, თავი შეიკავონ ისეთი განცხადებების გაკეთებისგან, რომელიც ქვეყანაში გამოიწვევს დაპირისპირებასა და ძალადობას. ქართველი ერი არასდროს დაუშვებს ქვეყანაში გეი აღლუმების ჩატარებას.

მთელმა მსოფლიომ უნდა გაიგოს, რომ ქართველი ერი ჭეშმარიტ სარწმუნოებას, ქვეყანას, ღირსებასა და ზნეობას არასდროს უღალატებს, რომ საქართველოში უზნეობა ვერასდროს გაიმარჯვებს, ვინც არ უნდა უჭერდეს მხარს.

ვინაიდან პრაიდის ორგანიზატორები არ ითვალისწინებენ ხელისუფლების რეკომენდაციებს და უპირისპირდებიან მთელ მოსახლეობას, ხელისუფლებამ, ქვეყნისა და საზოგადოების ინტერესებიდან გამომდინარე, თავად უნდა აღკვეთოს უზნეობის პროპაგანდა და უზრუნველყოს ქვეყანაში სიმშვიდე და სტაბილურობა”, – აცხადებს ალექსანდრე ერქვანია.

Amnesty International თბილისი პრაიდთან დაკავშირებით განცხადებას ავრცელებს და მოუწოდებს საქართველოს ხელისუფლებას, გაატაროს ყველა საჭირო ზომა იმისთვის, რომ უზრუნველყოს პრაიდის მონაწილეების უსაფრთხოება.

საერთაშორისო ორგანიზაცია საკუთარ განცხადებაში აღნიშნავს, რომ საქართველოში არსებობს ჰომოფობიურად განწყობილი ძალადობრივი ჯგუფების უპრეცენდენტო მუქარა.

თბილისი პრაიდი ჩატარდება. ამის შესახებ ორგანიზატორებმა განცხადება დღეს გაავრცელეს.

“მიუხედავად არსებული რისკებისა, საქართველოს ისტორიაში პირველი ღირსების მარში ძალაშია და ჩვენ არ ვაპირებთ მის გაუქმებას. საჯარო მსვლელობაში ჩვენთან ერთად მონაწილეობას მიიღებენ ლგბტქი ადამიანების მხარდამჭერი ჯგუფები, ოჯახის წევრები, მეგობრები, საერთაშორისო ორგანიზაციებისა და დიპლომატიური კორპუსის წარმომადგენლობები, ევროკავშირისა და ჩვენი მეზობელი სახელმწიფოების მოქალაქეები,” – ნათქვამია განცხადებაში.

ორგანიზატორები გავრცელებულ განცხადებაში ხაზ უსვამენ, რომ მათ არაფორმალური დაჯგუფებები საფრთხეს უქმნიან, თუმცა, ამის ფონზე სახელმწიფო უმოქმედოა.

გუშინ 17 ივნისს, შს სამინისტროს წარმომადგენლებთან შეხვედრის შემდეგ, თბილისის პრაიდის ორგანიზატორებმა განაცხადეს, რომ სამომავლო ნაბიჯებთან დაკავშირებით გადაწყვეტილებას კონსულტაციების შედეგად მიიღებენ.

სახალხო დამცველის, ნინო ლომჯარიას თქმით შეხვედრაზე შსს-ს წარმომადგენელმა აქტივისტებს უთხრეს, რომ უსაფრთხოების გარანტიებს ვერ მისცემდნენ. თუმცა, პრაიდის ჩატარების შესახებ საბოლოო გადაწყვეტილება ორგანიზატორებს უნდა მიეღოთ.

გარდა ამისა, ლომჯარიას განმარტებით, შსს-მ ერთმნიშვნელოვნად თქვა, რომ ღია სივრცეში პრაიდის ჩატარების შემთხვევაში, უსაფრთხოების დაცვა ძალიან გაჭირდებოდა.

14 ივნისს, მას შემდეგ, რაც საპატრიარქომ ხელისუფლებას მოუწოდა, არ დაუშვან პრაიდის ჩატარება თბილისში, მთავრობის კანცელარიასთან ქვიარ უფლებათა აქტივისტები შეიკრიბნენ მშვიდობიან აქციაზე. ისინი ხელისუფლების წარმომადგენლებს სთხოვდნენ, გამიჯვნოდნენ ძალადობასა და ძალადობისკენ მოწოდებას, როგორადაც ისინი საპატრიარქოს განცხადებას მიიჩნევდნენ.

კანცელარიასთან ჰომოფობიური კონტრაქციაც გაიმართა. ამ მხარის მყოფი ადამიანების ნაწილი აგრესიულად ეპყრობოდა ჟურნალისტებს, ემუქრებოდა მათ, პრაიდის ერთ-ერთ ორგანიზატორს, გიორგი თაბაგარს ესროლეს კვერცხი და ა.შ. მათი მხრიდან პოლიციამ 28 ადამიანი დააკავა. ქვიარ აქტივისტების მხარეს არავინ დაუკავებიათ.

აქციის შემდეგ, 16 ივნისს, ვერის ბაღში შეკრებილი ჰომოფობიური ჯგუფები, ბიზნესმენ ლევან ვასაძის ხელმძღვანელობით, იმუქრებოდნენ, რომ თბილისში პრაიდის ჩატარებას არ დაუშვებენ. ლევან ვასაძემ ვერის ბაღში გამართულ შეკრებაზე განაცხადა, რომ თბილისის პრაიდისა და მისი მხარდამჭერების წინააღმდეგ ქმნის თვითორგანიზებულ ჯგუფებს – „სახალხო რაზმებს“, რომლებიც, მისი თქმით, ერთი კვირის განმავლობაში „იპატრულირებენ“ თბილისში.

ვასაძემ თქვა, რომ კომბლებით იქნებიან შეიარაღებულნი და გაარღვევენ “ნებისმიერ კორდონს, რასაც პოლიცია დააყენებს”.

შინაგან საქმეთა მინისტრის მოადგილემ ამასთან დაკავშირებით განაცხადა, რომ ყველას მიმართ ვინც ხელს აღმართავს პოლიციელზე, სამინისტროს მხრიდან მკაცრი რეაგირება იქნება. უწყებამ გმაოძიებაც დაიწყო რის შემდეგაც, ვასაძემ განაცხადა, რომ პატრულირებას აუქმებს.

ამ მოვლენების ფონზე ქვიარ აქტივისტებსა და შსს-ის წარმომაგენლებს შორის შეხვედრა გაიმართა, რომლის დასრულების შემდეგაც ომბუდსმენმა ნინო ლომჯარიამ განაცხადა, რომ შსს-მ პრაიდის ორგანიზატორებს ღონისძიების გაუქმება შესთავაზა.