ადგილობრივების თქმით, ხაიშში სიტუაცია დაძაბულია, ხელისუფლებასთან მოლაპარაკება კი გრძელდება
ხაიშში ხელისუფლებასა და მოსახლეობას შორის მოლაპარაკება გრძელდება, თუმცა, ადგილობრივების თქმით, სიტუაცია ძალიან დაძაბულია, მოსახლეობა კი, “გამწარებული”.
“მოლაპარაკება გრძელდება, მასში სოზარ სუბარის გარდა სამხარეო ხელისუფლებაც იღებს მონაწილეობას. სიტუაცია ამ დროისთვის უცვლელად დაძაბულია, ჯერჯერობით არაფერი ვიცით, თუმცა ვეძებთ გამოსავალს. პოლიციის შენობაში არიან, არავინ გამოსულა იქიდან,” – უთხრა ნეტგაზეთს ადგილობრივმა გარი ჩხვიმიანმა.
ადგილობრივებთან შეხვედრაზე იმყოფება რეგიონულ საკითხებში პრემიერ-მინისტრის მრჩეველo სოზარ სუბარი, რომელმაც შესვლამდე განაცხადა, რომ ეცდება ადგილობრივებთან საერთო გამოსავალი ნახოს, ან მათ მიერ ხის მოპოვება კანონიერ ჩარჩოებში მოექცეს. თუმცა დასძინა, რომ “კანონი უნდა კანონობდეს” და მოსახლეობის ერთ ნაწილისთვის “განსხვავებული კანონი” ვერ იარსებებს.
- დღეს, 26 ივლისს, ხაიშსა და ჭუბერში ფინანსური პოლიცია შევიდა, რასაც მოსახლეობასთან დაპირისპირება მოჰყვა. საქმე ხე-ტყის შესაძლო უკანონო მოპოვებას ეხება.
- დაპირისპირების შემდეგ სვანეთში ასობით პოლიციელი შევიდა. შსს-ში განგვიცხადეს, რომ უსაფრთხოების მიზნით შეიყვანეს დამატებით პოლიციის ჯგუფები ორ სოფელში, თუმცა არავინ დაუკავებიათ.
- ფინანსთა სამინისტროს საგამოძიებო სამსახურიდან გვაცნობეს, რომ ამ დრომდე მიმდინარეობს ღონისძიება ჭუბერსა და ხაიშში ხე-ტყის უკანაონო მოპოვებასთან დაკავშირებით, თუმცა ადგილობრივი მოსახლეობა მათ კვლავ არ აძლევს საგამოძიებო მოქმედებების ჩატარების საშუალებას. საგამოძიებო სამსახურის განცხადებით, ჭუბურისა და ხაიშის მოსახლეობამ მათი თანამშრომლების სიცოცხლეს საფრთხე შეუქმნა, რის გამოც სპეცრაზმის მობილიზება გახდა საჭირო.
- ადგილობრივები საზოგადოებას, ხელისუფლებას, სახალხო დამცველს და დიპკორპუსს მოუწოდებენ, დაიცვან სვანეთი განუკითხაობისგან: “მოგვეცით ალტერნატიული განვითარების საშუალება ან დაგვცოხეთ და ამით დასრულდება ყველაფერი! დაგვაყენეთ საშველი, სანამ მთელი სვანეთი არ გამსკდარა დენთის კასრივით!
- ომბუდსმენის აპარატში განგვიცხადეს, რომ ბოლო პერიოდში სვანეთსა და რაჭაში მოსახლეობა აქტიურად აპროტესტებდა ჰესების მშენებლობას, ხოლო დღევანდელი სპეცრაზმის გამოჩენა მოსახლეობამ პროტესტის ჩახშობის მცდელობად მიიღო.
- პოლიციელის მიერ გადატენილი იარაღის ადგილობრივისთვის შუბლზე მიბჯენის შესაძლო ფაქტზე გენისპექციას მოკვლევა არ დაუწყია, რადგან ოფიციალურად არავის განუცხადებია ეს.
- პრემიერ-მინისტრი აცხადებს, რომ მთავრობა შეურიგებელი იქნება ყველას მიმართ, ვინც ჩართულია ხე-ტყის უკანონო ჭრაში. პრემიერის მრჩეველი კი ამბობს, რომ რბილი მიდგომა აქვთ სვანეთში ხე-ტყის მოპოვებაზე, რადგან ალტერნატიული წყარო მოსახლეობას არ გააჩნია.
- მწვანე ალტერნატივა სვანეთში ჩატარებული ოპერაციის მასშტაბებს არაპროპორციულად მიიჩნევს. ორგანიზაცია გაუგებრად მიიჩნევს, რატომ შევიდა რაიონში ასობით პოლიციელი და სპეცრაზმელი მაშინ, როცა ადამიანები საქართველოს სხვა ნაწილებში დააკავეს.