მე არ მაწყობს რევოლუცია – მოკლული დადუნაშვილის მამა
დღეს, 1 ივნისს, პარლამენტის შენობის წინ მიმდინარე აქციაზე “ნუ მომკლავ” მივიდა ხორავას ქუჩაზე მოკლული კიდევ ერთი არასრულწლოვნის, ლევან დადუნაშვილის მამა. მისი თქმით, იგი გვერდით უდგას ზაზა სარალიძეს, არც თავადაა კმაყოფილი გამოძიებით, მაგრამ მიიჩნევს, რომ რევოლუციის დრო არ არის.
სიტყვით გამოსვლის დროს ლევან დადუნაშვილის მამამ განაცხადა, რომ აქციაზე მისი მისვლის მიზეზი ერთ-ერთი გამომსვლელი გახდა, რომელიც ამბობდა, რომ ლევან დადუნაშვილის ნათლიაა, რაც სიმართლეს არ შეესაბამება:
“მე ზაზას თანადგომას ვუცხადებ, ზაზას გვერდში ვარ. ჩემი ტრაგედია და ზაზას ტრაგედია ერთია. ჩვენი ტკივილი საქართველოს ტკივილია, მაგრამ დავიღალე. მე მინდა ყველას მოგმართოთ, მოდი, ის გამოძიება, რომელზეც კითხვები გვიჩნდება და არ მთავრდება, ეს გამოძიება დამთავრდეს. მე მოგიწოდებთ, ის ხალხი, ვინც ზიხართ ტელევიზორებთან და თქვენს შვილებს ხელს აფარებთ, გამოვიდეთ ყველა და მივმართოთ ყველას, რომ თავიანთი შვილები…. ის მშობლები, მშობლები მაშინ იქნებიან, ეს ტრაგედია მაშინ აღარ განმეორდება, როცა ვაიძულებთ იმ გათითოკაცებულ ხალხს, რომლებიც სახლში სხედან და არ გამოჰყავთ თავისი შვილები, რომ ჩვენება მისცენ.
ზაზა, შენს გვერდში ვარ. მთავრობა შენს გვერდშია. დავდგეთ ერთად, გამოვიძიოთ, ჩემო ძმაო. მივცეთ შანსი. რევოლუცია მე არ მაწყობს. მე მინდა ჩემი შვილის მკვლელი ბოლომდე დაისაჯოს. სამართლით მეც არ ვარ კმაყოფილი, მაგრამ, ჩემო ზაზა, დღეს გამოსავალი არის ეს”,- თქვა დადუნაშვილის მამამ.
მის გამოსვლას აქციაზე უკმაყოფილება მოჰყვა. აქციის მონაწილეები ამბობდნენ, რომ “სხვა მთავრობა გამოიძიებს” ამ საქმეს. აქციის ერთ-ერთმა მონაწილემ დანარჩენებს მოუწოდა, რომ “პატივი სცენ შვილმკვდარი მამის აზრს”. თავად სარალიძე და დადუნაშვილი რამდენჯერმე გადაეხვივნენ ერთმანეთს.
თბილისში, ხორავას ქუჩაზე მოკლული ლევან დადუნაშვილის მკვლელობის საქმეზე თბილისის საქალაქო სასამართლომ 31 მაისს გამამტყუნებელი განაჩენი გამოიტანა. რაც შეეხება იმავე ჩხუბის დროს მოკლულ დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.
სასამართლოს გადაწყვეტლების გამოცხადების შემდეგ, მოკლულის მამა ზაზა სარალიძე და მისი მხარდამჭერები პროკურატურასთან მივიდნენ და საპროტესტო აქცია გამართეს. დავით სარალიძის მამა აცხადებს, რომ სანამ მისი შვილის მკვლელებს არ დააკავებენ და არ დაისჯება ყველა დამნაშავე, მათ შორის, პროკურორები, აქციებს არ შეწყვეტს. სარალიძე გამოძიების ხელახლა ჩატარებას ითხოვს. გარდა ამისა, აქციის მთავარი მოთხოვნა მთავრობის გადადგომაა.
31 მაისს საქართველოს პრემიერ-მინისტრმა გიორგი კვირიკაშვილმა განაცხადა, რომ მკვლელობის საქმის გამოძიება დაუბრუნდება შინაგან საქმეთა სამინისტროს და საქმეს უხელმძღვანელებს უშუალოდ შს მინისტრი გიორგი გახარია.
პირველ ივნისს ცნობილი გახდა, რომ ხორავას ქუჩაზე მომხდარი ტრაგედიის საქმეზე შსს ატარებს გამოძიებას, რათა დაადგინოს პირები, ვინც მუდმივად, ფარულად ცდილობდნენ ფაქტების, მათ შორის, ექსპერტიზის დასკვნების დამახინჯებას და ფინანსური თუ სხვა გავლენების გამოყენებით სასამართლო განხილვის შედეგებზე ზემოქმედებას.
