გახარია: ხალხის უსაფრთხოება უმნიშვნელოვანესია, მიუხედავად ორიენტაციისა და მრწამსისა
შინაგან საქმეთა მინისტრი, გიორგი გახარია, “ჩვენი თავისუფლებისთვის” აქციის ორგანიზატორებთან შეხვედრის შემდეგ დემონსტრანტებს ბოდიშს უხდის. მისი თქმით, ის ბოდიშს იხდის არა მხოლოდ მისი, არამედ უწყების სახელითაც. როგორც გახარია განმარტავს, შექმნილ ვითარებაში თითოეული მოქალაქის უსაფრთხოება და ჯანრმთელობა, მიუხედავად მათი ორიენტაციისა და მრწამსისა, ყველაზე მნიშვნელოვანია.
“თითოეული მოქალაქის უსაფრთოხება და ჯანმრთელობა არის ყველაზე მნიშვნელოვანი და არ აქვს არანაირი მნიშვნელობა მის ორიენტაციას თუ რელიგიურ მრწამსს. ასევე, რა თქმა უნდა, მინდა მივმართოთ ყველა მოქალაქეს, რომელიც რუსთაველის ქუჩაზე არის შეკრებილი, ჩვენ ყველამ უნდა ვეცადოთ და შევინარჩუნოთ ის მიღწევები, თავისუფლებისა და გამოხატვის, რომელიც გვაქვს და არ შევიდეთ კონფლიქტში, რომელიც დაგვაკარგვინებს დროს. ამ წუთიდან დავემორჩილოთ პოლიციის მითითებებს, ხვალ ჩემი დაპირებების გათვალისწინებით, მივცეთ საშუალება თბილისს, იცხოვროს ჩვეულებრივი, სამუშაო, ნორმალური ორშაბათი დღით. თქვენ ხართ ამ ქვეყნის მომავალი და ჩვენ უნდა გვესმოდეს, რომ ყველა ადამიანი, რომელიც დღეს დგას ქუჩაში, არის ღირებული ამ ქვეყნის მომავლისთვის,”- განაცხადა გახარიამ.
ტვ პირველის ცნობით, 23:04 საათზე შინაგან საქმეთა მინისტრისა და აქციის წევრების, მათ შორის, ბექა წიქარიშვილის, სოფო ვერძეულის, ვახუშტი მენაბდის და ნაჯა ორაშვილის შეხვედრა დაიწყო.
ბექა წიქარიშვილი წარმოადგენს “თეთრი ხმაური მოძრაობას”, სოფო ვერძეული – “ადამიანის უფლებების სწავლებისა და მონიტორინგის ცენტრს”, ნაჯა ორაშვილი არის კლუბ “ბასიანის ” დამფუძნებელი, ვახუშტი მენაბდე კი არის კონსტიტუციონალისტი და აქტივისტი.
შეხვედრა პარლამენტის შენობაში მიმდინარეობდა. გიორგი გახარია რუსთაველის გამზირზე მას შემდეგ მივიდა, რაც აქციას “ჩვენი თავისუფლებისთვის” ნაციონალისტური ჯგუფები კონტრაქციით დაუპირისპირდნენ. ადგილზე მობილიზებულია სპეცდანიშნულების რაზმი და წყლის ჭავლის ტექნიკა.
საპროტესტო აქცია თბილისში 12 მაისს კლუბ “ბასიანში” და “გალერიში” ჩატარებულ სპეცოპერაციას მოჰყვა.
მოვლენათა ქრონოლოგია
- სამართალდამცავებმა სპეცოპერაცია “გალერისა” და “ბასიანში” 12 მაისს, შუაღამისას, დაახლოებით პირველ საათზე, ერთდროულად დაიწყეს;
- როგორც შსს ამბობს, ნარკოტიკების რეალიზაციის ბრალდებით 8 პირი დააკავეს, თუმცა ოპერაციის პარალელურად პოლიციამ კლუბების მიმდებარედ შეკრებილი ათეულობით ადამიანი დააკავა;
- სპეცოპერაციის წინააღმდეგ პროტესტი პარლამენტთან გაგრძელდა. ათეულობით პოლიციელმა დემონსტრანტებს აქციის თავისუფლად ჩატარების უფლება არც აქ მისცა და ადამიანების დაკავება რუსთაველის გამზირზეც გააგრძელა;
- დაკავებულთა შორის იყვნენ “თეთრი ხმაურის მოძრაობის” წევრი ბექა წიქარიშვილი და “გირჩის” პრეზიდენტობის კანდიდატი ზურაბ ჯაფარიძე.
- პოლიციამ ადმინისტრაციული წესით დაკავებული ყველა პირი დილით ხელწერილით გაათავისუფლა. უცნობია, როდის განიხილავს ამ პირებზე შედგენილი ადმინისტრაციული სამართალდარღვევების საქმეებს სასამართლო.
- შსს-მ 12 მაისს გამართულ ბრიფინგზე თქვა, რომ ნარკორეალიზაციის ბრალდებით დაკავებულთა წინააღმდეგ მოსამართლის განჩინების საფუძველზე ჩაწერილი ვიდეომტკიცებეულები აქვს.
- 12 მაისის შუადღის სამი საათიდან გვიან ღამემდე პარლამენტთან მიმდინარეობდა აქცია-კონცერტი სახელწოდებით “ჩვენი თავისუფლებისთვის”. აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.
- სახალხო დამცველმა ნინო ლომჯარიამ თქვა, რომ ნარკორეალიზებაში ბრალდებულები კლუბებში სპეცოპერაციამდე რამდენიმე საათით ადრე დააკავეს და მათი დაკავების ადგილი რომელიმე კლუბი არ ყოფილა;
- ნარკორეალიზაციაში ბრალდებულთა ადვოკატები ამბობენ, რომ მათ ხელი გაუთქმელობაზე მოაწერინეს და შესაბამისად, საქმის დეტალებზე ვერ ისაუბრებენ. ერთი-ერთი ადვოკატის თქმით კი, რვავე ბრალდებულის წინააღმდეგ ჩვენებას ერთი მოწმე აძლევს და ყველა შემთხვევაში საუბარია ერთი და იგივე ნივთიერების გასაღებაზე.