მოსკოვში ერთ-ერთ საბავშვო სავაჭრო ცენტრს ხანძარი გაუჩნდა
მოსკოვში საბავშვო სავაჭრო ცენტრ “პერსეის” ხანძარი გაუჩნდა. წინასწარი ცნობებით, ხანძარი სავაჭრო ცენტრის მეოთხე სართულზე გაჩნდა, სადაც სათამაშოების საწყობია განლაგებული. როგორც Meduza წერს, ამ დროისთვის ცნობილია, რომ ხანძრის შედეგად ერთი ადამიანი დაიღუპა.
RIA-ს ინფორმაციით, მეხანძრეებმა სავაჭრო ცენტრში მყოფნი საევაკუაციო კიბით ჩამოიყვანეს, მათ შორის არიან დაშავებულებიც.
რაც შეეხება სხვა დეტალებს, “დოჟდის” ინფორმაციით, ხანძრის გაჩენის დროისთვის შენობაში 300-მდე ადამიანი იმყოფებოდა, ხანძარი მოსკოვის დროით 12:32 საათზე დაიწყო.
ამ დროისთვის ხანძრის კერა ლიკვიდირებულია, თუმცა ტერიტორიაზე მძიმე დაკვამლიანებაა, წერს Meduza.
მოსკოვის “პერსეის” ხანძარი რუსეთის კიდევ ერთი ქალაქის, კემეროვოს სავაჭრო ცენტრის ხანძრის შემდეგ მოხდა.
- ხანძარი კემეროვოს სავაჭრო ცენტრში 25 მარტს, შუადღისას გაჩნდა.
- ბოლო მონაცემებით, ხანძარს 64 ადამიანი შეეწირა. მათგან 41 ბავშვია. დაკარგულია 85 ადამიანი, მათ უმეტესობას, ასევე, ბავშვები შეადგენენ.
- 27 მარტს კემეროვოში რუსეთის პრეზიდენტი ვლადიმერ პუტინი ჩავიდა, რომელმაც ტრაგედიის ადგილზე ყვავილები მიიტანა. მან მომხდარს “დანაშაულებრივი გულგრილობა” უწოდა.
- ხანძრის შემდეგ საგამოძიებო უწყებების თანამშრომლებმა ხუთი ადამიანი დააკავეს. მათ შორის არიან სავაჭრო ცენტრის დირექტორი და დაცვის თანამშრომლები. მათ ბრალად უსაფრთხოების ნორმების დაუცველობა ედებათ.
- საგამოძიებო უწყების წარმომადგენლები აცხადებენ, რომ ხანძრის უსაფრთხოებაზე პასუხისმგებელმა ერთ-ერთმა პირმა სიგნალიზაცია გამორთო. ბლოკირებული იყო შენობის გასასვლელებიც.