საზოგადოებრივი მაუწყებლის ბორდის წევრობის მსურველი ზაზა შათირიშვილი ადასტურებს, რომ მაუწყებლის გენერალური დირექტორი ვასილ მაღლაფერიძე მისი მეგობარია. ბორდის წევრობის შესარჩევი კომისიის წევრმა სოსო გალუმაშვილმა (ჯეპრა) შათირიშვილს ჰკითხა, როგორ მოახერხებს ბორდში არჩევის შემთხვევაში საზმაუს მენეჯმენტის და მისი მეგობრის, გენერალური დირექტორის კონტროლს?

“ჩემი უახლოესი მეგობარი და ჩემი გაზრდილია, როგორც სტუდენტი, ზურაბ ჭიაბერაშვილი. მეტსაც გეტყვით: ჩემი ერთი შვილი მის მიერ არის მონათლული. როდესაც ის ქალაქის მერი იყო და იმ საათის ისტორია მოხდა, სახლში არ შემოვუშვი და იმის მერე გაწყდა ჩვენი მეგობრობა”, – განაცხადა შათირიშვილმა სამეურვეო საბჭოს წევრის შესარჩევი კომისიის სხდომაზე.

“მე ზურაბ ჭიაბერაშვილის მაგალითი შემთხვევით არ ვთქვი. ამის მერე დაიწყო რეპრესიები. მთელი 9 წელი ჩემი ყოფილი მეგობრების წინააღმდეგ ვიყავი. ჩემი ძალიან ახლო მეგობარი იყო ლევან რამიშვილი, ასევე, გიგა ბოკერია. თუ ის მოვახერხე, რომ ამათ დავუპირისპირდი, მე მგონი, ვასიკო მაღლაფერიძე არ იქნება პრობლემა. ყველას დავუპირისპრდები, ვისაც დავინახავ… არავისთან დაპირისპირება არ გამიჭირდება”, – ასე უპასუხა შათირიშვილმა უკვე შესარჩევი კომისიის მეორე წევრს სალომე უგულავას (ტაბულა).