გიორგი მამალაძის საქმე სააპელაციო სასამართლოში 7 თებერვალს გაგრძელდება
დღეს, 31 იანვარს, თბილისის სააპელაციო სასამართლომ “ციანიდის საქმეზე” დეკანოზ გიორგი მამალაძის დაცვის მხარემ დასკვნითი სიტყვა წარმოთქვა. სიტყვით გამოსვლას გეგმავდა თავად გიორგი მამალაძეც, თუმცა დღევანდელ სადომაზე ეს ვერ მოესწრო.
მომდევნო სხდომა 7 თებერვალს, 13:30-ზე დაინიშნა.
სააპელაციო საქმეზე დღევანდელი სხდომა, ისევე როგორც სხვა სხდომები, დახურული იყო. შესაბამისად, პროცესის დასრულების შემდეგ ჟურნალისტებს ინფორმაციას ადვოკატები და პროკურორი აწვდიან. ასევე, ადვოკატებს ხელი აქვთ მოწერილი საქმის მასალების გაუთქმელობაზე, რის გამოც “ციანიდის საქმის” დეტალები საზოგადოებისთვის ცნობილი არ არის.
როგორც ადვოკატმა მიხეილ რამიშვილმა განაცხადა, ადვოკატების დასკვნით სიტყვაში დეტალურად იყო მოყვანილი ის ფაქტები, რომლებიც მიუთითებს, რომ საქმეში გიორგი მამალაძის წინააღმდეგ მტკიცებულება არ არსებობს.
“ეს იყო გარკვეული პირების მიერ დაგეგმილი, ორგანიზებული ბინძური, ყველანაირი მორალისგან გასული თითქოსდა ვითომ დანაშაულის აღმოფხვრა, რომელიც ბუნებაში არ არსებობს. დღემდე ვერ გაარკვიეს, ვერ დაადგინეს და არც არსებობს ციანიდის გამსაღებელი და იმისგან ვითომ მამა გიორგის შეუძენია. ეს არის ყველაფერი ჩადებული სამართალდამცავების მიერ, სუსი იყო, პროკურატურა თუ აეროპორტის ძალოვანი სტრუქტურები, თვითონ გაარკვიონ,”- განაცხადა ადვოკატმა.
პროკურორი ზვიად გუბელაძე კი ამბობს, რომ დაცვის მხარეს დასკვნით ეტაპზე სიახლე და არგუმენტირებული პოზიცია არ წარმოუდგენია:
“ისინი ისევ იმ პოზიციაზე იყვნენ, რომელიც თბილისის საქალაქო სასამართლომ უსაფუძვლოდ ცნო, საერთოდ არ გაიზაირა. ჩვენ დასკვნით სიტყვაში აღნიშნულ არგუმენტებზე სრულად გვაქვს პასუხი გაცემული. გვაქვს მოლოდინი, რომ თბილისის სააპელაციო სასამართლო გამამტყუნებელ განაჩენს გამოიტანს გიორგი მამალაძს მიმართ,”- განაცხადა პროკურორმა.
- დეკანოზ მამალაძეს თბილისის საქალაქო სასამართლომ 9 წლიანი პატიმრობა 2017 წლის 5 სექტემბერს მიუსაჯა. მას ბრალად პატრიარქ ილია მეორის მდივან–რეფერენტის მკვლელობის მცდელობა დაუმტკიცდა.
- დეკანოზი გიორგი მამალაძე საქართველოს პროკურატურამ 10 თებერვალს დააკავა თბილისის საერთაშორისო აეროპორტში, როდესაც ის ბერლინში მიემგზავრებოდა, სადაც საქართველოს მართლმადიდებელი ეკლესიის პატრიარქს, ილია მეორეს ოპერაცია უტარდებოდა. პროკურატურის ცნობით, დეკანოზის ბარგის ჩხრეკისას ამოიღეს ფარულად შენახული შხამიანი ნივთიერება -„ნატრიუმის ციანიდი“.
- პროკურატურის ცნობით, ამ საქმეზე გამოძიება 2017 წლის 2 თებერვალს დაიწყო ჟურნალისტ ირაკლი მამალაძის განცხადების საფუძველზე, რომელმაც მიმართა საქართველოს პროკურატურას და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების – ციანიდის მოძიებაში დახმარება, რომლის გამოყენებითაც ამ უკანასკნელს, როგორც შეხვედრისას განმცხადებელმა გაარკვია, უნდა მოეხდინა მაღალი იერარქიის სასულიერო პირის სიცოცხლის ხელყოფა.
- მოგვიანებით პროკურატურამ განმარტა, რომ დეკანოზი გიორგი მამალაძე აპირებდა შორენა თეთრუაშვილის მკვლელობას.
- 2017 წლის 12 თებერვალს საქართველოს პროკურატურის შუამდგომლობის საფუძველზე თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.
- მამალაძე თავდაპირველად ბრალდებული იყო საქართველოს სისხლის სამართლის კოდექსის 18-108-ე (მკვლელობის მომზადება) და 236-ე მუხლებით (ცეცხლასასროლი იარაღის უკანონო შეძენა-შენახვა), რაც სასჯელის სახედ და ზომად ითვალისწინებდა თავისუფლების აღკვეთას ვადით შვიდიდან თხუთმეტ წლამდე. მოგვიანებით, პროკურატურამ მამალაძეს ბრალი დაუმძიმა, კერძოდ, სსკ-ის 18, 109-ე მუხლის მე-3 ნაწილის „გ“ ქვეპუნქტით წარუდგინა ბრალდება (განზრახ მკვლელობის მომზადება ანგარებით), რაც სასჯელის სახედ და ზომად ითვალისწინებდა 16-დან 20 წლამდე თავისუფლების აღკვეთას.
- საბოლოოდ სასამართლომ ისევ გადააკვალიფიცირა მუხლი 18-108-ზე და სწორედ მკვლელობის მომზადებაში ცნო დეკანოზი დამნაშავედ.
- თავად დეკანოზი მამალაძე ბრალს არ აღიარებს, მისი თქმით, ციანიდის ყიდვა თავად შორენა თეთრუაშვილმა სთხოვა.
- დეკანოზ მამალაძის საქმის სასამართლო განხილვა დახურული იყო, ასევე, ადვოკატებს გაუთქმელობის ხელწერილზე აქვთ ხელი მოწერილი, რის გამოც საზოგადოებისთვის უცნობია საქმის მასალები.