“საზოგადოებრივი მაუწყებლის” ვებ-გვერდზე ზვიად რატიანის შესახებ ვიდეო კვლავ ხელმისაწვდომია

“საზოგადოებრივი მაუწყებლის”  სტრატეგიული სამსახურის უფროსი ია ანთაძე ამბობს, რომ მისი პასუხისმგებლობის მიღმაა, წაიშლება თუ არა არხის ვებ-გვერდიდან პოეტ ზვიად რატიანთან დაკავშირებული ვიდეო.

“აი, ეგ კითხვა დაუსვით ბორდს, ბორდმა უნდა გასცეს ამაზე პასუხი. მე არ შემიძლია ამაზე გიპასუხოთ იმიტომ, რომ ეს ჩემი პასუხისმგებლობების მიღმაა, ხომ გესმით?!”- ამბობს ანთაძე.

2017 წლის 27 დეკემბერს 18:00-საათიან მოამბეში გავიდა სიუჟეტი, რომელიც თბილისის საქალაქო სასამართლოში  პოეტ ზვიად რატიანის ადმინისტრაციული საქმის განხილვას ეხებოდა. სიუჟეტში გამოიყენეს  პოლიციის შენობაში გადაღებული ვიდეოჩანაწერი, სადაც ისმის ინფორმაცია რატიანის ჯანმრთელობის მდგომარეობის თაობაზე. აგრეთვე, გამოქვეყნდა მეორე ჩანაწერიც.  ჩანაწერებში იგი არაფხიზელ მდგომარეობაში იმყოფება და პოლიციის წარმომადგენლების მიმართ შეურაცხმყოფელ გამონათქვამებს იყენებს, რაც რატიანისვე განმარტებით,  პოლიციის წარმომადგენლების მიერ მის მიმართ არასათანადო მოპყრობით იყო გამოწვეული.

რატიანმა “საზოგადოებრივ მაუწყებელს” თვითრეგულირების ორგანოშიც უჩივლა და მასალის წაშლა მოითხოვა, რომელიც დღემდე ხელმისაწვდომმია არხის ვებ-გვერდზე:

ია ანთაძეს ასევე ვკითხეთ მისი მოსაზრების შესახებ, უნდა გამოექვეყნებინა თუ არა “საზოგადოებრივ მაუწყებელს” ზვიად რატიანთან დაკავშირებული ჩანაწერი და რას გულისხმობს ის პასუხისმგებლობა, რომელიც არხის გენერალურმა დირექტორმა ვასილ მაღლაფერიძემ აიღო ვიდეოს გავრცელებასთან დაკავშირებით:

“საქმე ისაა, რომ ძალიან უხერხული იქნება, რომ ამ თემაზე მეტი კონკრეტიკით დავიწყო ლაპარაკი იმიტომ, რომ მთლიანი ჩვენი გუნდის პასუხი არის ასეთი, რომ გენერალური დირექტორი საკუთარ თავზე იღებს პასუხისმგებლობას, რაც ნიშნავს, რომ მის ქვევით ვინც ვართ ჩვენ ყველა, ჩვენს პასუხისმგებლობებზე ამჯერად ლაპარაკი აღარ არის. რაც შეეხება დირექტორის უშუალო პასუხისმგებლობას, ეს არის ბორდის და დირექტორის განსახილველი საკითხი და წყდება მათ შორის ურთიერთობაში. თუ ბორდი ჩათვლის, რომ ეს იყო ისეთი გადაცდომა და შეცდომა, რომ იმსახურებს ამ ტიპი რეაქციას, ექნება ეს რეაქცია. თუ ჩათვლის, რომ იყო შეცდომა, ექნება ისეთი რეაქცია, რაც ეკუთვნის შეცდომას. მეტი რა გითხრათ? არ ვკონკრეტდებით ამ თემაზე, რაც ვასილ მაღლაფერიძემ ბორდთან განაცხადა, რომ ეს არის მისი პირადი პასუხისმგებლობის თემა”, –  განაცხადა ანთაძემ “ნეტგაზეთთან” საუბრისას.

• ზვიად რატიანი 24 დეკემბერს, ღამით დააკავეს და 10 საათის შემდეგ გაათავისუფლეს. პოლიცია მას დაუმორჩილებლობას ედავება, ხოლო პოეტი სამართალდამცველებს ფიზიკურ და მორალურ ძალადობაში ადანაშაულებს.
• შინაგან საქმეთა სამინისტროს გენერალურმა ინსპექციამ გამოძიების დასრულებამდე მხოლოდ ერთ პოლიციელს შეუჩერა უფლებამოსილება.
• პოეტს სხეულზე არაერთი დაზიანება აღენიშნება, მათ შორის სახის არეში. ზვიად რატიანი აცხადებს, რომ მას არაერთი პოლიციელი მხოლოდ იმის გამო ურტყამდა, რომ ქურთუკის ფერი არ მოეწონათ. დაშავებულის თქმით, თავდაპირველად ოთხი უცნობი პირი მივიდა მასთან სამოქალაქო ფორმით, რასაც შსს უარყოფს და აცხადებს, რომ ვიდეო-მასალა არსებობს, სადაც ზვიად რატიანი პოლიციელებს აგინებს და არ ემორჩილება.
• ზვიად რატიანს მხარდაჭერას უცხადებენ მისი კოლეგები, რომლებიც აცხადებენ, რომ როდესაც ცნობილ პოეტს ასე გამეტებით სცემენ სამართალდამცველები, რთული წარმოსადგენი არ არის, რას გაუკეთებენ ისინი უცნობ მოქალაქეს.
• შსს-ს განმარტებებსა და სამართალდამცველების გამამართლებელ განცხადებებას მწერლები “ბრიყვულს” უწოდებენ და მიიჩნევენ, რომ საპატრულო პოლიცია საბჭოთა მილიციად გადაიქცა. ისინი იმ პოლიციელების სამაგალითო დასჯას მოითხოვენ, რომლებმაც ზვიად რატიანი სასტიკად სცემა.
• მოგვიანებით, თბილისის პროკურატურის საგამოძიებო ნაწილში დაიწყო გამოძიება საქართველოს შინაგან საქმეთა სამინისტროს ცალკეული თანამშრომლების მხრიდან პოეტ ზვიად რატიანის მიმართ სამსახურებრივი უფლებამოსილების შესაძლო ძალადობის გადამეტების ფაქტზე, დანაშაული გათვალისწინებული საქართველოს სსკ-ის 333-ე მუხლის მესამე ნაწილის “ბ” ქვეპუნქტით.
• 29 დეკემბერს თბილისის საქალაქო სასამართლომ ზვიად რატიანი 2 000 ლარით დააჯარიმა.
• საზოგადოებრივი მაუწყებლის გენერალურმა დირქტორმა ვასილ მაღლაფერიძევიდეოს გადაცემასთან დაკავშირებით პასუხისმგებლობა თავის თავზე აიღო.
• საქართველოს ჟურნალისტური ეთიკის ქარტიის საბჭოს გადაწყვეტილებით ზვიად რატიანის საქმეზე, ახალი და მიმდინარე ბლოკის დირექტორმა გიორგი გვიმრაძემ და ვებსაიტის რედაქტორმა ირინა დეკანოიძემ ქარტიის პირველი და მეათე პრინციპები დაარღვიეს.