დღეს კანცელარიასთან გაიმართება სოლიდარობის აქცია, სახელწოდებით “ სოლიდარობა პანკისს: პანკისი არ არის შორს”. აქციის ორგანიზატორების თქმით, ისინი სახელმწიფოსგან თემირლან მაჩალიკაშვილის საქმის ეფექტურ გამოძიებასა და მომხდარის გამო სუსისთვის პოლიტიკური პასუხისმგებლობის დაკისრებას ითხოვენ.
გარდა ამისა, აქციის ორგანიზატორები აღნიშნავენ, რომ სახელმწიფოს მიერ ვიდეომასალის გავრცელებით , სადაც, უწყების ცნობით, მაჩალიკაშვილი აღბეჭდილია იმ პირებთან ერთად, რომლებიც არიან ახმედ ჩატაევის დაჯგუფების წევრები, სახელმწიფო მაჩალიკაშვილის დისკრედიტაციას ცდილობს.
“შემთხვევის ადგილზე გადაღებული ვიზუალური მასალა, ასევე ოჯახის წევრების ახსნა-განმარტებები აჩენს ეჭვებს, რომ სპეცრაზმმა თემირლან მაჩალიკაშვილს მის ბნელ ოთახში შეჭრისთანავე მყისიერად, გაფრთხილების გარეშე ლოგინშივე ესროლა. პრობლემურია დაჭრილისთვის დაგვიანებული სამედიცინო დახმარების გაწევის საკითხიც. მაშინ, როდესაც თემირლან მაჩალიკაშვილს ჯერ ბრალდებულის სტატუსიც კი არ აქვს მინიჭებული, ვიდეომასალის გავრცელებით სახელმწიფო საჯაროდ ცდილობს მისი ბრალეულობის მტკიცებასა და დისკრედიტაციას”- ნათქვამია აქციის ორგანიზატორების განცხადებაში.
მათივე თქმით, პანკისის ხეობაში მცხოვრები ადამიანების პოლიტიკური და სოციალური გარიყულობის დაძლევისთვის, სისტემური ცვლილებების ნაცვლად, სახელმწიფო მხოლოდ რეპრესიულ და სადამსჯელო ინსტრუმენტებს იყენებს.
“პანკისის საგანგებო სივრცედ წარმოჩინება, სახელმწიფოს „ლეგიტიმური“ ძალადობისა და კონტროლის დამყარებისა და ამით საკუთარი ძალაუფლების განტკიცების შესაძლებლობას აძლევს. პანკისის ხეობაში მხოლოდ სპეცოპერაციისა და კონტროლის სტრატეგიით მოქმედი სახელმწიფო ადგილობრივი მოსახლეობის გარიყულობას აძლიერებს და ართულებს სოციალური სამართლიანობისა და სტაბილურობის მიღწევას”
აქციის წევრების მოთხოვნებია :
[checklist]
[/checklist]
აქციის ორგანიზატორები არიან ადამიანის უფლებების სწავლებიდა და მონიტორინგის ცენტრი (EMC) ; ადამიანის უფლებათა ცენტრი ; თეთრი ხმაურის მოძრაობა და აუდიტორია 115.
თემირლან მაჩალიკაშვილს პანკისში დღეს, 11 იანვარს დაკრძალავენ.