ნუცუბიძის პლატოზე ადმინისტრაციული წესით დაკავებისას დაღუპული პაატა პავლიაშვილის ოჯახი დაზარალებულის სტატუსის მინიჭებას ითხოვს, რითიც ისინი საქმის მასალების გაცნობას შეძლებენ. ამის შესახებ დღეს პროკურატურაში განცხადება საიას იურისტმა ლევან ვეფხვაძემ შეიტანა.
როგორც საიას იურისტი აცხადებს, დაელოდებიან პროკურატურის გადაწყვეტილებას მათ მოთხოვნაზე, ხოლო დადებითი პასუხის შემთხვევაში უკვე ოფიციალურად მოითხოვენ ამ საქმეზე მუხლის გადაკვალიფიცირებას.
“მიგვაჩნია, რომ გამოძება უნდა წარიმართოს სამსახურებრივი გულგრილობის მუხლით და არა გუფრთხილებლობით სიცოცხლის მოსპობით. ეს მოთხოვნა ჯერ არ დაგვიყენებია, რადგან ველოდებით დაზარალებულის სტატუსის მინიჭებას. ამის მერე დავაყენებთ მუხლის გადაკვალიფიცირების მოთხოვნასაც,” – ამბობს ლევან ვეფხვაძე.
შსს-მ ამ საქმესთან დაკავშირებით გაავრცელა ვიდეო, სადაც მოქალაქეები საუბრობდნენ, თითქოს პაატა პავლიაშვილი დამოკიდებული იყო ალკოჰოლზე და ფსიქოტროპულ ნივთიერებებზე. ადამიანის უფლებების სწავლებისა და მონიტორინგის ცენტრის იურისტის, გურო იმნაძის თქმით, პრობლემაა, როცა სამართალდამცავი უწყებები აქცენტს იმაზე აკეთებნ, თითქოსდა გარდაცვლილი იმყოფებოდა ალკოჰოლური თრობის ქვეშ და მოიხმარდა ფსიქოტროპულ ნივთიერებებს.
დაკავების დროს დაღუპული პაატა პავლიაშვილი ოჯახთან, დედასთან და დასთან ერთად ცხოვრობდა, ძმა კი 2 წლის წინ გარდაეცვალა. პავლიაშვილს ორი მცირეწლოვანი შვილი ჰყავდა. როგორც ოჯახის ახლობლები ამბობენ, გარდაცვლილის უფროსი შვილი წელს სკოლაში პირველად მივიდა. გარდაცვლილის მეგობრების თქმით, პავლიაშვილს ჯანმრთელობის სერიოზული პრობლემები არ ჰქონია. მომხდარზე გამოძიება საქართველოს სისხლის სამართლის კოდექსის 116-ე მუხლის პირველი ნაწილით მიმდინარეობს, რაც სიცოცხლის გაუფრთხილებლობით მოსპობას გულისხმობს. საქმეს პროკურატურა იძიებს.
ნუცუბიძის პლატოზე მამაკაცის ადმინისტრაციული წესით დაკავებისას დაღუპვის საქმეზე, მაღალი საზოგადოებრივი ინტერესიდან გამომდინარე, პოლიციის შესაძლო გადაცდომის ფაქტს საქართველოს სახალხო დამცველი სწავლობს. გარდა ამისა, პაატა პავლიაშვილის ოჯახის უფლებებს საქართველოს ახალგაზრდა იურისტთა ასოციაცია იცავს. ორგანიზაციას იურიდიული დახმარების გაწევის თხოვნით დაღუპულის ოჯახის წევრებმა მიმართეს.